Foto: Almaty ákimdigi
Qazaqstanda balalarǵa qatysty zorlyq-zombylyq, qatygezdik jáne jábirleý faktilerine jedel áreket etýdiń biryńǵai vedomstvoaralyq algoritmi bekitildi. Bul týraly Oqý-aǵartý ministrligi málimdedi, dep habarlaidy Ult.kz.
Jańa qujat «Quqyq buzýshylyq profilaktikasy týraly» zań aiasynda qabyldanǵan. Onda alǵash ret politsiia, bilim berý uiymdary, meditsina qyzmetkerleri men qorǵanshylyq organdarynyń jaýapkershilik aiasy naqty bólingen.
Endi bala quqyǵynyń buzylýy týraly kez kelgen aqparat mindetti túrde belgilengen is-qimyldar tizbegin iske qosady. Júieniń basty jańalyǵy – keis-menedjerler institýtynyń engizilýi. Árbir jaǵdai boiynsha arnaiy maman bekitilip, ol barlyq qyzmetterdiń jumysyn úilestirip, balanyń quqyǵy tolyq qalpyna kelgenshe qoldaý kórsetedi.
Sonymen qatar áreket etý merzimderi naqty belgilendi. Aqparat dereý tiisti organdarǵa jetkizilip, 1 saǵat ishinde bala quqyqtaryn qorǵaý organyna jiberiledi. 1 jumys kúni ishinde keis-menedjer taǵaiyndalyp, balanyń jaǵdaiy tekseriledi. Al materialdar 3 jumys kúninen keshiktirilmei arnaiy komissiiaǵa joldanýy tiis.
Jańa tártipke sáikes, tek resmi ótinishter ǵana emes, balalardyń óz signaldary, «111» bailanys ortalyǵynyń málimetteri, áleýmettik jeliler men BAQ monitoringi de tekserýge negiz bolady.
Balalarǵa kórsetiletin kómek te biryńǵai standartqa kóshirildi. Ol meditsinalyq, psihologiialyq, pedagogikalyq, áleýmettik jáne quqyqtyq qoldaýdy qamtidy. Sonymen birge, endi memlekettik qorǵaý tek zorlyq-zombylyq qurbandaryna ǵana emes, sondai oqiǵaǵa kýá bolǵan balalarǵa da kórsetiledi.
