Elimizde balalarǵa arnalǵan tólqujatty qoldaný merzimin qysqartý jaǵy qaralyp jatyr, dep habarlaidy QazAqparat.
«Balalarǵa arnalǵan tólqujat berýde halyqaralyq tájiribeni eskere otyryp, onyń merzimin qysqartýdy usynamyz. Sebebi balalardyń syrtqy kelbeti tez ózgeredi. Iaǵni balalar tólqujatyn 12 jasqa deiin emes, 5 jasqa deiin etip berip, sodan soń qaita aýystyrsa. 12 jastan 16 jasqa deiin beriledi. Odan ári tólqujat pen jeke kýáliktiń jaramdylyǵy ádettegidei 10 jyl bolyp qala beredi. Sonymen qatar kámeletke tolmaǵan balalarǵa beriletin tólqujat úshin memlekettik baj salyǵyn 8 AEK-ten (23 336 teńge) 4 AEK-ke (11 668 teńge) deiin tómendetý usynylady», - dedi QR Parlamenti Májilisiniń depýtaty Erlan Smailov Májilistiń zańnama jáne sot-quqyqtyq reforma komitetiniń otyrysynda jasaǵan baiandamasynda.
Onyń aitýynsha, qazaqstandyqtar jyl saiyn 600-700 myń tólqujat rásimdeidi eken. Onyń 20%-y balalar tólqujaty.
«Sońǵy 5 jyl ishinde elimizde 3 035 956 eresek azamattarǵa arnalǵan tólqujat jáne 610 061 balalar tólqujaty daiyndalypty. Balalar tólqujatynyń merzimin qysqartýǵa qatysty joǵaryda aityp ótkenimdei, olardyń syrtqy kelbeti tez ózgeredi. Iaǵni bala tez ósedi de, 2-3 jyldan keiin tólqujattaǵy sýreti, dál sol kezdegi túrine sáikes kelmei jatady. Sol sebepti keide ata-analarǵa jańa tólqujat jasatýǵa týra keledi. Bul ata-ananyń qaltasyna júk túsiredi, ásirese otbasynda 2-3 bala bolsa», - deidi ol.
