«Junior Eurovision Song Contest» halyqaralyq án baiqaýynyń ulttyq irikteýine qatysýǵa ótinimderdi qabyldaý bastaldy. Bul sharany «Habar» agenttigi Qazaqstan Respýblikasynyń Mádeniet jáne sport ministrligimen birlese otyryp uiymdastyrýda. Baiqaýdyń finaly 2020 jyldyń 29 qarashasynda Varshavada (Polsha) ótedi, dep habarlaidy "Ult aqparat".
Osy baiqaýǵa Qazaqstannyń osymen úshinshi márte qatysýda. Baiqaýǵa 9 jastan 14 jasqa deiingi oryndaýshylar qatysa alady (final ýaqyty kezinde - iaǵni, 2020 jyldyń 29 qarashasynda úmitkerdiń jasy osy kórsetkishten asyp ketpeýi kerek).
Ulttyq irikteý 4 kezeńnen turady.
Birinshi kezeń – ótinimderdi qabyldaý. Qatysýshylarǵa saýalnamany toltyryp, ózi oryndaǵan ánniń beinejazbasyn Ulttyq irikteýdiń resmi saityna jevision.khabar.kz júkteýi kerek. Ótinimder 20 tamyzǵa deiin qabyldanady.
Ekinshi kezeń – bul halyqaralyq án baiqaýlarynyń jeńimpazdary men tanymal oryndaýshylardan quralǵan ádil-qazy alqalarynyń sheshimimen eń myqty degen 30 qatysýshyny irikteý kezeńi.
Úshinshi kezeń - jevision.khabar.kz saityndaǵy onlain daýys berý satysy. Bul kezeńde qazaqstandyqtardyń árqaisysy ózine unaǵan qatysýshyǵa daýystaryn bere alady. Onlain daýys berý nátijesi boiynsha Ulttyq irikteýdiń 12 finalisi anyqtalatyn bolady.
Tórtinshi kezeń – Ulttyq irikteýdiń finaly, bul kezeńde elimizdiń eń tanymal degen kompozitorlarynyń qatysýshylarǵa arnap jazǵan arnaiy ánin oryndaý arqyly, 12 finalist ándi sheber oryndaý jaǵynan jarysqa túsedi. Ádil-qazylar alqasynyń bergen baǵasy men SMS daýys berý nátijesinde jeńimpaz anyqtalatyn bolady. Eń kóp upai jinaǵan finalist Varshavada ótetin «Junior Eurovision Song Contest» Halyqaralyq án baiqaýynda Qazaqstan atynan saiysqa shyǵatyn bolady.
Esterińizge sala keteiik, Qazaqstan «Balalar Evrovideniesi» baiqaýyna úshinshi ret qatysýda. 2018 jyly baiqaýǵa Daneliia Tóleshova «Ózińe sen» ánimen qatysyp, altynshy orynǵa ie boldy. Byltyrǵy jyly Erjan Maksim «Armanyńnan qalma» ánimen ekinshi oryn aldy (qazylar alqasynyń sheshimi boiynsha birinshi oryn).
Instagram: @jevision2020.kz
