Elimizde kópbalaly analarǵa arnalǵan járdemaqyny bárine birdei berý máselesi kóterildi, dep habarlaidy QazAqparat.
Atalǵan másele búgin Úkimet úiinde ótken baspasóz máslihaty barysynda qozǵaldy.
Baspasóz konferentsiianyń suraq-jaýap kezinde tilshi «Elimizde kópbalaly analardyń otbasylyq tabysyna qaramastan ár bala úshin 4 AEK kóleminde járdemaqy tóleý engizildi. Endigi ýaqytta atalǵan járdemaqyny bala sanyna qaramai barlyq analarǵa birdei tóleý máselesi qozǵalyp jatyr. Osy oraida ministrliktiń ustanymy qandai?» dep saýal joldady.
«Elimizde ana men balany qorǵaý baǵytynda qabyldanǵan keshendi sharalar bar. Búgingi kúni analarǵa memleket tarapynan tólem júktilik jáne bosanǵan kezde beriledi. Sondai-aq, týǵannan keiin bala kútimi boiynsha 1 jyl boiy taǵaiyndalady. Jáne bul járdemaqy barlyǵyna birdei tólenedi. Kópbalaly analar máselesine kelsek, ótken jyly 4 jáne odan da kóp balasy bar analarǵa járdemaqy tóleý júiesi engizildi. Ony engizýde eki negizgi sebep bar. Birinshiden, elimizde bala týýdy yntalandyrý maqsatynda. Aita keter bolsaq, 2019 jyly Qazaqstanda kópbalaly ana sany 252 myń bolsa, ótken jyly ol kórsetkish 428 myńǵa jetti. Bir jyl úshin aitarlyqtai jaqsy kórsetkish. Ekinshi sebep, kópbalaly otbasylardyń tabysyn arttyrý maqsatynda taǵaiyndalyp otyr», - dedi QR Eńbek jáne halyqty áleýmettik qorǵaý ministri Serik Shápkenov óz jaýabynda.
Sondai-aq, ministr atalǵan járdemaqynyń tek kópbalaly otbasylarǵa arnalǵanyn basa aityp, barlyq anaǵa teńdei járdemaqy tóleý ministrlik josparynda joq ekenin jetkizdi.
