Elimizde BAQ jumysy men sala mamandaryn qoldaýǵa arnalǵan birqatar sharalar qabyldanbaq. Bul týraly QR Aqparat jáne qoǵamdyq damý vitse-ministri Kemelbek Oishybaev málim etti, dep habarlaidy QazAqparat.
«BAQ ókilderin qoldaý sharalary qabyldanady, ol óz kezeginde medianyń damýyna oń áserin tigizetini sózsiz. Atap aitqanda, tilshilerge talap qoiý (sotqa aryzdaný) merzimin 1 jylǵa deiin qysqartý qarastyrylyp otyr. Qazirgi ýaqytta tilshilerge talap qoiý merzimi shektelmegen. Osy oraida 1-2 jyldan keiin, tipti 10 jyldan keiin de BAQ-taǵy faktilerdi teriske shyǵarý talabymen aryz berilgenine kýá boldyq. Bul BAQ jumysy úshin aitarlyqtai kedergi», - dedi K. Oishybaev.
Sondai-aq, vitse-ministrdiń sózine sensek, tótenshe jaǵdai kezinde jáne qaýipti jerlerde jumys istegen BAQ ókilderiniń áleýmettik mártebesin anyqtaý boiynsha jeke jumys júrgiziledi.
«Sonymen qatar, elimizde BAQ-tyń jekelegen túrlerin tirkeýdi ońtailandyrý boiynsha usynystar ázirlenip jatyr. Bul rette BAQ aldaǵy ýaqytta da qoljetimdi, tekserilgen aqparat kózi jáne aýditoriia senimine ie bolýy tiis. Jáne zań aiasynda belgilengen strategiiaǵa sai jumys isteýi tiis. Bir sózben aitqanda, aqparat taratý tásili, tehnologiiasy men quraly qanshalyqty ózgerse de, bizdiń basty qaǵidattarymyz ózgerissiz qalady. Ol degenimiz - aqparat berýdegi jedeldilik, anyqtyq jáne konstrýktivtilik», - dep túiindedi ministr orynbasary.
Buǵan deiin K. Oishybaev otandyq media naryqqa ólshem jasalyp jatqanyn aitty.
Onyń aitýynsha, media tutynýshylardy kóbinese qandai kontentter qyzyqtyrady jáne ony qaidan taýyp qaraityny anyqtalmaq.
Aita ketsek, ministr orynbasary «Astana Media Week – 2021» media aptalyǵy aiasyndaǵy «Mediany damytý strategiiasy» atty dóńgelek ústel barysynda baiandama jasady.
