Jaiaý júrginshilerdiń tártibine qatysty problema bar. Bul týraly QR IIM Ákimshilik politsiia komiteti tóraǵasynyń orynbasary Serik Túsipov aitty, dep habarlaidy QazAqparat.
«Taldaý nátijesine súiensek, qazirgi kezde joldaǵy ólim-jitimge jol-kólik oqiǵalarynyń úsh negizgi túri bailanysty bolyp otyr. Osy oraida jaiaý júrginshilerdi qaǵyp ketý, kóliktiń aýdarylýy men avtomobilderdiń soqtyǵysýy jaǵdailary bar. Jol-kólik oqiǵalarynyń osy túrlerinen ólim-jitim basqa jol apattarynynan qaza bolǵandardyń 58 paiyzyn qurady», - dedi Túsipov onlain brifingide.
Osy oraida ol jaiaý júrginshilerge qatysty málimetterdi atap ótti.
«Jaiaý júrginshiler qaýipsizdigi máselesi ózekti bolyp tur. Elimizdegi árbir úshinshi jol-kólik oqiǵasy, árbir tórtinshi qaza bolǵan men jaraqat alǵan olardyń úlesine tiesili. Sonymen qatar, jaiaý júrginshilerdiń tártibine qatysty problema bar ekenin atap ótken jón. Jyl basynan olardyń tarapynan 155 myńnan astam ereje buzý anyqtaldy», - dedi ol.
