Qazgidromet aldaǵy úsh kúnge arnalǵan aýa raiy boljamyn jariialady, dep habarlaidy "Ult aqparat".
«Aldaǵy úsh táýlikte Qazaqstannyń basym bóliginde aýa temperatýrasynyń birtindep tómendeýine Ortalyǵy Ekaterinbýrgte ornalasqan ylǵaldy tsiklon áser etedi. Kei jerlerde qar jaýady, jel kúsheiedi, soltústik jartysynda burqasyn bolady», - delingen Qazgidromet habarlamasynda.
Elimizdiń batys aimaqtaryna sýyq soltústik-batys antitsiklonnyń jyljýymen 15 qarashadan bastap jaýyn-shashynnyń toqtaýy múmkin. Túngi ýaqyttarda elimizdiń basym bóliginde 10-18 gradýs aiazǵa deiin, Qazaqstannyń ońtústik-batysynda, ońtústiginde, ońtústik-shyǵysynda jáne shyǵysynda 2-13 aiazǵa deiin aýa temperatýrasynyń birtindep tómendeýi kútilýde. Respýblika boiynsha kei jerlerde tuman túsip, ońtústikte kóktaiǵaq bolady.
