Búgin astanada jańadan ashylǵan Mýzykalyq jas kórermen teatry Muhtar Áýezovtyń "Abai – Toǵjan" mýzykalyq dramasymen saltanatty túrde tuńǵysh maýsymyn ashty, dep habarlaidy "Ult aqparat".
Biyl qyrkúiektiń sońynda arnaiy kasting uiymdastyrylǵan bolatyn. Sol kezde 50-den astam daryndy ártis tańdap alyndy. Sodan 1 qazanda óner ordasy óz jumysyn bastap ketken. Teatrdyń akterlik quramynda Qazaqstannyń eńbek sińirgen qairatkeri, 71-shi Kann halyqaralyq kinofestivaliniń jeńimpazy Samal Esliamova, "Daryn" Memlekettik jastar syilyǵynyń laýreattary Aian Ótepbergen, Asylhan Tólepov, Ádilhan Makin, Rasýl Ýsmanov jáne taǵy basqa jas ártister bar. Teatrdyń direktory – Qazaqstannyń eńbek sińirgen qairatkeri, filosofiia doktory Ashat Maemirov.
"Qazaqstannyń teatr keńistiginde tuńǵysh ret sahnalanyp otyrǵan "Abai – Toǵjan" mýzykalyq dramasy – jasóspirimderdiń júrek qylyn shertip, oi-armandaryn asqaqtatyp, sanasyna serpin berip, jigerin qairap, ishki mádenieti men rýhani jan-dúniesin baiytyp, eldik sezimi biik ulaǵatty urpaqty tárbieleý jolynda eleýli úles qosýdy murat tutady", - deidi Maemirov.
Onyń aitýynsha, qoiylymnyń basym bóligi mýzykadan turady. Aldaǵy ýaqytta "Abai – Toǵjan" dramasy negizinde miýzikl shyǵarý josparlanyp otyr.
Qoiylymda Abaidyń bozbala kezi kórsetilgen. Jas Abaidyń júreginde oianǵan alǵashqy mahabbat, tuńǵysh jyry, ishki sezim tebirenisteri, Toǵjanǵa degen ińkár sezimi, Qunanbaidai ákeniń ónegesi, Uljandai ananyń tárbiesi, qorshaǵan ortanyń tylsym syry, ǵashyqtyqtyń ǵalamaty, dos pen baýyrdyń qadiri – osynyń bárin ártister sheber jetkize bildi.
Abaidyń rólin "Daryn" Memlekettik jastar syilyǵynyń iegeri Aian Ótepbergen, Aman Ǵumarov men Didar Tólegen somdasa, Toǵjandy Arelana Amangeldieva, Diana Naǵmetýllaeva men Jansulý Tólegen oinap shyqty. Qunanbai – Qazaqstannyń eńbek sińirgen qairatkeri Berik Aitjanov jáne Altynbek Súndet, Uljan – 71-shi Kann kinofestivaliniń jeńimpazy, Qazaqstannyń eńbek sińirgen qairatkeri Samal Esliamova men Láila Temirhan.
Qoiylymnyń mýzykalyq keńesshisi – Dimash Qudaibergen, qoiýshy-sýretshi – Alma Syrbaeva, kompozitory – Baýyrjan Aqtaev, baletmeisteri – Shyryn Mustafina, hormeisteri – Ǵalymjan Berekeshev.
Aita keteiik, qoiylymnyń premerasy 14, 15, 16 jeltoqsan kúnderi ótedi.
