10 tamyzda Qazaqstanda 7 657 adamnyń analizinen koronavirýs anyqtaldy. Bir kúnde 7 521 adam jazyldy. Densaýlyq saqtaý ministrliginiń sársenbi kúngi habarlamasynda osyndai málimet kórsetilgen.
11 tamyzda densaýlyq saqtaý ministri Aleksei Tsoi elde tamyz bastalǵaly beri virýs báseńdedi dep málimdedi. Biraq qazir soǵan qaramastan kúnine ortasha eseppen 7 myń ainalasynda naýqas tirkelip jatyr. Barlyq oblystar men qalalar "qyzyl aimaqta" tur.
Táýlik kórsetkishi boiynsha aldyńǵy oryndarda Almaty (1493), Nur-Sultan (1153), Qaraǵandy oblysy (1125), Atyraý oblysy (618), Shymkent (574), Aqtóbe oblysy (304) tur. Qalǵan oblystarda anyqtalǵan naýqastar 300-ge jetpeidi.
Densaýlyq saqtaý ministrliginiń málimetinshe, 9 tamyzda 588 adamǵa koronavirýs pnevmoniiasy diagnozy qoiylǵan. Sol kúni 154 adam ólimi tirkelgen: 130 adam – koronavirýstan, 24 adam koronavirýs pnevmoniiasynan qaitys boldy dep aitylady.
Densaýlyq saqtaý salasynyń mamandary virýstyń kúsheiýin koronavirýstyń delta variantynyń jyldam taraýymen bailanystyrady. Dárigerlerdiń aitýynsha, delta "aǵza tańdamaidy, ol jyldam asqynady, sozylmaly aýrýdyń joqtyǵy aýrýdyń asqynbaýyna kepildik bola almaidy".
Indet bastalǵaly beri 656 myń adamnyń koronavirýs testi oń shyqqan. 540 myńy jazylǵan. 7103-i qaitys bolǵan. 2020 jyldyń tamyz aiynan beri 64 myń adam koronavirýs pnevmoniiasyna shaldyqqan. 3949-i qaitys bolǵan.
Qazir 112 myń adam koronavirýstan emdelip jatyr. 30 myń naýqas statsionarda jatyr. 1808 adamnyń jaǵdaiy aýyr, 451 naýqastyń hali múshkil. 215 adam jasandy tynys apparatyna qosylǵan.
10 tamyzdaǵy jaǵdai boiynsha, Qazaqstanda koronavirýs infektsiiasyna qarsy vaktsinanyń 1-shi komponentin 5 879 016, 2-shi komponentin 4 505 662 adam saldyrǵan.
Vaktsinanyń eki komponentin alǵan óńirler arasynda aldyńǵy orynda Almaty qalasy tur – 619 144 adam. Odan keiin Túrkistan oblysy - 468 376, Almaty oblysy - 457 562, Shyǵys Qazaqstan oblysy - 365 940, Qaraǵandy oblysy 318 151 tur.
