75 myń talapker bilim grantyn taǵaiyndaý konkýrsyna qatysýǵa ótinish berdi, dep habarlaidy "Ult aqparat" Bilim jáne ǵylym ministrligine silteme jasap.
Qujat qabyldaý 16-26 shilde aralyǵynda júzege asyryldy. B aiqaý nátijesi 15 tamyzǵa deiin jariialanady.
Úmitkerler arasynda 7054 «Altyn belgi» iegeri, 576 halyqaralyq jáne respýblikalyq olimpiadalardyń jeńimpazdary, sondai-aq patriottyq sezimi men belsendi azamattyq ustanymy úshin úzdik belgisimen marapattalǵan 705 bala bar.
Ball teń bolǵan jaǵdaida olar basym quqyqqa ie bolady.
«Sonymen qatar biyl BǴM alǵash ret halyqtyń áleýmettik osal toptarynan shyqqan balalarǵa kvota bóldi. Endi jetim balalar, ata-anasynyń qamqorlyǵynsyz qalǵan balalar, tórt jáne odan da kóp kámeletke tolmaǵan balalardy tárbielep otyrǵan otbasylardan shyqqan balalar, tolyq emes otbasylardan shyqqan balalar, erekshe qajettilikteri bar balalardy tárbielep otyrǵan otbasylardan shyqqan balalar, jeńildikter men kepildikter boiynsha Uly Otan soǵysynyń qatysýshylary men múgedekterine teńestirilgen adamdar úshin joǵary oqý oryndaryna túsý múmkindigi artty. Olarǵa arnaiy granttar bólingen. Kámeletke tolmaǵan tórt jáne odan kóp bala tárbielep otyrǵan otbasylardaǵy balalar úshin granttardyń jalpy sanynyń 5%-y, keminde úsh jyl tolyq emes otbasy mártebesi bar otbasylardan shyqqan balalarǵa – 1%, I, II toptaǵy múgedek balalardy tárbielep otyrǵan otbasylardan shyqqan túlekterge bilim berý granttarynyń 1%-y kózdelgen», – dep atap ótti QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev.
Sondai-aq aýyl jastary arasynan shyqqan azamattar úshin aýyldardyń áleýmettik-ekonomikalyq damýyn aiqyndaityn mamandyqtarǵa jáne QR azamaty emes, ulty qazaq adamdarǵa kvota qarastyrylǵan.
Biyl 145 myńnan astam talapker Ulttyq biryńǵai testileýden ótti. UBT qorytyndysy boiynsha shekti baldy 88 myńnan astam adam jinady. Bul – qatysýshylardyń jalpy sanynyń shamamen 60%-y.
Biyl ortasha ball - 69. Bul ótken jylmen salystyrǵanda 5 balǵa joǵary.
UBT qorytyndysy boiynsha keminde 65 ball jinaǵan talapkerler ulttyq joǵary oqý oryndarynda grantqa úmitker bola alatynyn aita keteiik.
«Pedagogikalyq ǵylymdar» baǵyty boiynsha keminde 75 ball, «Densaýlyq saqtaý» − keminde 70 ball, «Aýyl sharýashylyǵy jáne bioresýrstar», «Veterinariia» – keminde 60 ball, basqa joǵary oqý oryndaryna oqýǵa túsý úshin keminde 50 ball qajet.
Granttar taǵaiyndaý jónindegi sheshimdi Respýblikalyq konkýrstyq komissiia qabyldaidy. Konkýrstyq komissiianyń otyrysy 10 tamyzǵa deiin ótedi.
Komissiia quramyna memlekettik organdardyń, qoǵamdyq uiymdardyń ókilderi, jýrnalister, «Qazaqstan stýdentteri Aliansynyń» jáne «Otandastar» qorynyń ókilderi kirdi.
