Biyl elimizde jańadan 39 sý qoimaisy salynady. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev málim etti, dep habarlaidy QazAqparat.
«Biyl Qazgidrometpen birlesip ózen jáne sý tasqyny aǵyndarynyń kólemine taldaý júrgizdik. Sondai-aq, elimizdiń 9 óńirinde jalpy kólemi 3,6 mlrd kýb km bolatyn 39 jańa sý qoimasyn salý josparlanǵan. Odan bólek, biyl Túrkistan oblysyndaǵy Keńsai-Qosqorǵan sý qoimasynyń qurylysy aiaqtalady. Jańa sý qoimalaryn salý 70 eldi meken úshin sý tasqyny qaýpin azaitýǵa, 394 myń gektar jańa sýarmaly jerdi ainalymǵa engizýge jáne aýyl sharýashylyǵynda 129 myńnan astam jumys oryndaryn qurýǵa múmkindik beredi», - dedi Maǵzum Myrzaǵaliev ÚEU ókilderimen kezdesý barysynda.
Sonymen qatar, ministrdiń sózinshe, jańa sý qoimalary transshekaralyq ózen sýlaryna táýeldi bolmaýǵa múmkindik beredi.
«Byltyrǵy jyly Túrkistan oblysy Maqtaaral aýdanynda uzyndyǵy 12 shaqyrym bolatyn «K-19» magistraldy kanalyn tsifrlandyrý boiynsha pilottyq joba iske asyryldy. Kanaldy tsifrlandyrýdyń arqasynda sý sýarý shamadan 45% paiyzǵa kóp jumsalatyny anyqtaldy. Osy oraida biyl taǵy 16 sý kanalyn tsifrlandyramyz. Osylaisha aldaǵy 5 jyldyń ishinde uzyndyǵy 3,3 shaqyrymnan asatyn 212 sý arnasyn tsifrlandyrý josparda bar. Osy is-sharalardy iske asyrý 2,2 kýb km-ge deiin sýdy únemdeýge múmkindik beredi», - deidi ol.
