Elimizde ǵylymmen ainalysatyn mamandardyń sany artpaq. Naqty aitqanda, 2025 jyly otandyq ǵalymdardyń sanyn 32 myńǵa jetkizý josparlanyp otyr. Bul týraly QR Bilim jáne ǵylym ministrligi Ǵylym komitetiniń tóraǵasy Janna Qurmanǵalieva málim etti, dep habarlaidy QazAqparat.
«Bizdegi kúrdeli máselelerdiń biri - ǵalymdar sanynyń kúrt azaiýy. Qazirgi tańda elimizde ǵylym salasynda eńbek etýshilerdiń sany 22 myńnan sál ǵana asady. Osy oraida Ulttyq joba aiasynda 2025 jyly elimizdegi ǵalymdar sanyn kóbeitýdi iaǵni keminde 34 myńǵa jetkizýdi kózdep otyrmyz. Aldymen ǵylym salasyn qarjylandyrýǵa qatysty máseleni rettep alý kerek. Bul máseleni sońǵy 2 jylda erekshe nazar alyp kelemiz. Sonyń nátijesinde 2020-2021 jyly ǵylymǵa bólinetin qarjy kólemi 2 esege artty. Jáne otandyq ǵylym salasyna bólinetin qarjyǵa tek bizdiń ministrlik qana emes, odan bólek 9 ortalyq memlekettik organ jaýapty», - dedi Janna Qurmanǵalieva OKQ-de ótken baspasóz máslihatynda.
Komitet basshysynyń sózine sensek, biyl ǵylym salasyna 83 mlrd teńgeden astam qarjy bólindi.
«Sol qarjyǵa bizdiń komitet ǵalymdarǵa arnalǵan 5 granttyq jáne 2 baǵdarlamalyq baiqaý jariialady. Qazirgi tańda elimizde 1164 ǵylymi joba qarjylandyrylyp jatyr. Odan bólek, Memleket basshysynyń tapsyrmasyna sáikes 2 ret jas ǵalymdarǵa arnalǵan konkýrs uiymdastyryldy. Sonyń nátijesinde 315 ǵylymi joba iske asyryldy. Búginde elimizde 2 myńnan astam jas mamandar ǵylymmen ainalysyp jatyr», - deidi ol.
