© REUTERS / WILLY KURNIAWAN
Qazaqstanda 12 jasqa tolmaǵan balalarǵa koronavirýsqa qarsy vaktsina salýǵa ruqsat berilmegen, dep málimdedi densaýlyq saqtaý ministrligi sanitarlyq-epidemiologiialyq baqylaý komitetiniń basshysy Aijan Esmaǵambetova.
Jýrnalister Esmaǵambetovaǵa qazaqstandyq ata-analar 12 jasqa tolmaǵan balasyna óz erkimen koronavirýsqa qarsy vaktsina saldyra ala ma degen suraq qoidy, dep jazady Sputnik Qazaqstan.
Komitet basshysy Qazaqstanda resmi tirkelgen Pfizer vaktsinasynyń nusqaýlyǵynda tek 12 jastan asqan balalarǵa salýǵa bolatyny jazylǵanyn aitty. Alaida AQSh-ta Pfizer vaktsinatsiiasyn 5 jasqa tolǵan balalarǵa salýǵa ruqsat bar.
"Eger óndirýshi tiisti qujatty bizdiń Ulttyq saraptama jáne sertifikattaý ortalyǵyna tirkeýden ótkizýge engizse, nusqaýlyqta 5 jastan bastap dep kórsetse, bul ony 5 jasqa tolǵan balalardan bastap salýǵa múmkindik beredi. Alaida qazir bekitilgen nusqaýlyqqa sáikes 12 jastan bastap qana salýǵa bolady", - dedi Esmaǵambetova úkimet otyrysynan keiin.
"Bizdiń zańnamaǵa sáikes nusqaýlyq Qazaqstanda tirkelýge tiis. Sonda ǵana 12 jasqa tolmaǵan balalarǵa da paidalanýǵa múmkindik beredi", - dep atap ótti ol.
Aita keteri, balalarǵa koronavirýsqa qarsy Pfizer vaktsinasy tek ata-ananyń ruqsaty berilgennen keiin ǵana salynady.
Vaktsina 12-17 jas aralyǵyndaǵy balalarǵa, júktiliktiń 16-37 aptasyndaǵy áielderge jáne bosanǵanyna 42 kún bolǵan emshektegi balasy bar áielderge salynady.
