Ekologiia, geologiia jáne tabiǵi resýrstar ministri Maǵzum Myrzaǵaliev zańsyz qoqystardy tastaýǵa jol bermeý jáne ony joiý boiynsha qandai jumystar atqarylyp jatqanyn aitty, dep habarlaidy QazAqparat.
«Biz ákimdiktermen birlesip ǵaryshtyq monitoring barysynda anyqtalǵan Qazaqstan boiynsha barlyq zańsyz qoqys tastaityn jerlerdi joiýdy bastadyq. Bizdiń tapsyrys boiynsha «Qazaqstan Ǵarysh Sapary» monitoring júrgizdi. Ol 50 shaqyrym radiýstaǵy iri qalalardyń mańyndaǵy aýmaqty qamtidy. Búgingi kúni elimizdiń barlyq óńirlerinde jeti jarym 7,5 myńnan astam qoqys oryndary anyqtaldy. Biz ákimdiktermen birlesip olardy joiý jónindegi jospar jasadyq. Tek sońǵy 10 kún ishinde 1635 zańsyz qoqys oryny joiyldy. Bul jalpy sannyń 20 paiyzyn quraidy», - dedi Maǵzum Myrzaǵaliev OKQ-da ótken baspasóz máslihatynda.
Onyń aitýynsha, Qaraǵandy jáne Atyraý oblystarynda belsendi jumys júrgizilip jatyr.
«Ekinshiden, ministrlik ótken aptada árbir óńirdegi zańsyz qoqys oryndary boiynsha turǵyndardan aqparat jinaý úshin «jedel jeli» júiesin qosty. Ekranda tiisti aqparatty jiberýge bolatyn vatsap telefon nómirin (8-777-595-24-90) kóre alasyzdar. Alǵashqy 5 kún ishinde «jedel jelige» zańsyz qoqystar jaily eki júz jiyrma úsh (223) habarlama kelip tústi. Úshinshiden, Ishki ister ministrligimen, qoǵammen, eriktilermen jáne jýrnalistermen birlesip, biz zańsyz qoqys oryndary boiynsha aýqymdy qoǵamdyq reidter júrgize bastadyq. Osy dúisenbi kúni, mysaly, elorda mańyndaǵy zańsyz qoqys oryndaryna reid júrgizildi. Osyndai reidter barlyq óńirlerde júrgiziletin bolady. Olardyń nátijeleri týraly buqaralyq aqparat quraldarynda jáne áleýmettik jelilerde únemi habarlaityn bolamyz», - dedi ol.
