Foto: QR ǴJBM
QR Ǵylym jáne joǵary bilim ministri Saiasat Nurbek pen Ońtústik Koreianyń bilim berý vitse-ministri O Sok Hvan Almaty qalasynda Qazaqstannyń álemdik bilim berý keńistigine odan ári integratsiialaný máselelerin talqylady, dep habarlaidy Ult.kz.
Kezdesý barysynda Saiasat Nurbek Ońtústik Koreiadan kelgen áriptesterine Qazaqstanda Ortalyq Aziia bilim berý habyn qurýǵa baǵyttalǵan jobalar men sheteldik ýniversitetter filialdarynyń osy jobadaǵy róli jaily aityp berdi. Sol filialdardyń biri biylǵy oqý jylynda alǵashqy stýdentterge esigin aiqara ashady dep josparlanyp otyr.
«Qazir Túrkistan qalasynda Koreianyń Woosong University filialy ǵimaratynyń qurylysy júrip jatyr. Ol jańa oqý jylynyń aldynda resmi túrde ashylady. Alǵashqy qabyldanǵan stýdentterge arnap Woosong University 110 shákirtaqy bóldi, biz de óz tarapymyzdan qazaqstandyq stýdentterge qosymsha granttar bóletin bolamyz», – dedi ministr.
Sonymen qatar Saiasat Nurbek koreialyq jáne qazaqstandyq ýniversitetterdiń birlesken bilim berý jáne ǵylymi jobalary týraly da aitty. Atap aitqanda, Ońtústik Koreianyń mashina jasaý salasyndaǵy eń tájiribeli ýniversitetteriniń biri – Dong-Eui University Ahmet Baitursynov atyndaǵy ýniversitetpen birlesip, Qostanaidaǵy avtomobil zaýyttary úshin injener-mehanikterdi daiarlaý ústinde. Qorqyt Ata atyndaǵy Qyzylorda ýniversiteti SeoulTech Ulttyq ǵylym jáne tehnologiia ýniversitetimen birlesip, qos diplomdyq bilim berý baǵdarlamalaryn iske qosady, al Sátbaev ýniversitetiniń Metallýrgiia jáne baiytý institýty Ońtústik Koreianyń KAIST ónerkásiptik tehnologiialar institýtymen birge sirek kezdesetin jer metaldaryn qaita óńdeitin ortalyqty iske qosyp jatyr.
Ońtústik Koreianyń vitse-ministri O Sok Hvan:
«Qazaqstanda joǵary bilim berý salasy qalai damyp jatqany meni tańǵaldyrdy. Osyndai myqty áleýetimen jáne júieli túrde qurylǵan ádistermen Qazaqstan Ortalyq Aziianyń bilim berý naryǵynda jetekshi oryn alatynyna sózsiz senimdimin», – dedi.
Sondai-aq QR Ǵylym jáne joǵary bilim ministri Saiasat Nurbek pen Ońtústik Koreianyń bilim berý vitse-ministri O Sok Hvan Almaty qalasynda ashylǵan «Koreiada oqý» («Study in Korea») kórmesiniń ashylýyna qatysty. Munda 30-dan astam korei ýniversitetteri óz eksponattaryn usyndy. Kórme aiasynda Korei ýniversitetteriniń filialdarynda oqýǵa daiyndyq boiynsha keńester de berildi.
