Qazaqstan halyqty KVI-ge qarsy vaktsinanyń 2 dozasymen qamtý kórsetkishi boiynsha 105-orynda. Bul týraly Úkimet otyrysynda QR Densaýlyq saqtaý ministri Aleksei Tsoi aitty, dep habarlaidy QazAqparat.
«Álemdik reitingke sáikes, koronavirýs infektsiiasyna qarsy vaktsinatsiia júrgizgen 205 eldiń ishinde Qazaqstan halyqty KVI-ge qarsy vaktsinanyń 2 dozasymen qamtý kórsetkishi boiynsha 105-orynda tur jáne vaktsinatsiiamen qamtý halyq sanynyń 41 paiyzǵa jýyǵyna jetti. TMD elderi ishinde Qazaqstan men Ázerbaijan ǵana halyqty vaktsinatsiiamen qamtýda 40 paiyzdan joǵary kórsetkishke qol jetkizip otyr», - dedi ministr.
Onyń atap ótýinshe, elimizde halyqty koronavirýs infektsiiasyna qarsy vaktsinatsiialaý jalǵasyp jatyr.
«1-komponent 8,5 mln adam ekpe aldy. Ekpe alýǵa tiisti halyqty qamtý 74 paiyzdy nemese halyq sanynyń 44,8 paiyzyn quraidy. 2-komponentpen shamamen 7,7 mln adam qamtyldy», - dedi Aleksei Tsoi.
