Koloniialardaǵy beinebaqylaý kameralary arqyly jeti myńnan astam tártip buzýshylyq anyqtalyp, 65 sýitsidtiń aldy alyndy, dep habarlady Polisia.kz.
Tártip saqshylarynyń habarlaýynsha, qazir qylmystyq-atqarý júiesi bólimshelerinde bas bostandyǵynan aiyrylǵan adamdardy qadaǵalaý boiynsha jumys damyp jatyr.
Mekemelerdi de, QAJ jeke quramyn da tehnikalyq jaǵynan jabdyqtaý jáne damytý boiynsha qabyldanyp jatqan sharalar aiasynda 2015 jyldan beri beinebaqylaý jáne alyp júrýge bolatyn beinetirkeý júielerin engizý boiynsha jumystar belsendi júrgizilýde.
"Mundai shara mekemedegi adamdar men qyzmetkerlerdiń qaýipsizdigin qamtamasyz etýge, ustalǵandar men qyzmetkerler tarapynan quqyqqa qaishy áreketterdiń jasalmaýyna baǵyttalǵan", – deidi qylmystyq-atqarý júiesi komitetiniń bastyǵy Baqytjan Sádibekov.
2015 jyly QAJ mekemelerinde 7 myńǵa jýyq beinebaqylaý kamerasy boldy, qazir olardyń sany 14 myńǵa jetti. Al alyp júrýge bolatyn beinetirkegish sany alty ese artty.
Qazir koloniialardyń tehnikalyq jaǵynan jabdyqtalýy bas bostandyǵynan aiyrý túrindegi jazanyń oryndalýyna qoiylǵan mindetti tolyq kólemde sheshýge múmkindik bermeidi. Dei turǵanmen beinebaqylaý kómegimen 2020 jyldyń ózinde jazany óteýdiń belgilengen tártibinen jaltarǵan kúdiktiler, aiyptalýshylar men sottalǵandar tarapynan 7 myńnan astam tártip buzýshylyq tirkeldi.
Sonymen qatar beinebaqylaý arqyly QAJ mekemelerinde ustalatyn adamdardyń zańsyz áreketin ýaqytynda anyqtaý nátijesinde 2016 jyldan bastap 65 sýitsidke jol berilmedi. 2020 jyly osyndai alty jaǵdai tirkelgen.
"Bul baǵyt boiynsha tiimdilikti arttyrý jumystary toqtatylmaidy. Prezident tapsyrmasymen respýblikanyń QAJ mekemelerinde jappai beinebaqylaý ornatý josparlanǵan. Qazir aiyptalýshylar men sottalǵan azamattarmen jumys isteitin qyzmetkerlerdiń beinetirkegishti alyp júrý normasyn keńeitý máselesi pysyqtalýda", – dep tolyqtyrdy Sádibekov.
Al beinebaqylaý jazbasy ishki tártipti buzý týraly aktilerdi toltyrý kezinde aýdiovizýaldy dálel retinde qoldanylady.
