Memleket basshysy Qasym-Jomart Toqaev Qazaqstan koronavirýs pandemiiasynyń saldaryn salystyrmaly túrde sátti eńserip kele jatqanyn aitty, dep habarlaidy "Ult aqparat".
"Qazaqstan memlekettik qaryzy azdyǵynyń jáne edáýir qory bolǵanynyń arqasynda indet saldaryn birshama tiimdi eńserýde. Bul – bizdiń eleýli básekelik artyqshylyǵymyz. Odan aiyrylyp qalmaýymyz kerek", - dedi Prezident Qazaqstan halqyna Joldaýynda.
Alaida, onyń aitýynsha, sońǵy kezde biýdjettiń shyǵys bóligindegi mindettemelerdi oryndaý úshin biýdjet tapshylyǵy ulǵaityp, Ulttyq qordan alynatyn transfertterdi kóbeitý úrdisi paida bolǵan.
"Únemi osylai «aýyrdyń ústimen, jeńildiń astymen» júre almaimyz. Bizdegi qarjylyq ornyqtylyqtyń qory sonshalyqty sheksiz emes.
Biýdjettiń kirisin arttyrý úshin sharalar qabyldaý qajet ekeni sózsiz. Birinshi kezekte, memlekettik shyǵystardyń aýqymyn jáne onyń tiimdi jumsalýyn baqylaýda ustaý kerek. Ulttyq qordyń aktivterin qalpyna keltirý úshin biýdjet erejesin engizýdi tezdetken jón. Buǵan qajetti zańnamalyq ózgerister osy jyldyń sońyna deiin qabyldanýǵa tiis.
Jalpy, elimizge memleket qarjysyn, atap aitqanda, memlekettik qaryzdy, biýdjet saiasatyn jáne Ulttyq qordy basqarýdyń erejeler jinaǵy qajet. Úkimet pen Ulttyq bankten jyl sońyna deiin Memleket qarjysyn basqarý tujyrymdamasyn ázirleýdi suraimyn", - dedi Toqaev.
