Aqparat jáne qoǵamdyq damý ministrligi Olimpiada oiyndaryn transliatsiialaýǵa qansha qarajat jumsalǵanyn habarlady.
Bul málimetterdi ministrlik "Aq Jol" demokratiialyq fraktsiiasynyń depýtattyq saýalyna jaýap retinde jariialady.
Olimpiada oiyndarynyń kórsetilimine japonnyń Dentsu Inc kompaniiasy jáne onyń Ortalyq Aziiadaǵy ókili – shvedtiń Silver spring media kompaniiasy jaýap beredi.
"2018 jyldyń 16 qarashasynda atalǵan kompaniialar 2021 jáne 2022 jylǵy Olimpiada oiyndaryn jalpy somasy 15 million dollarǵa (tehnikalyq shyǵyndardy qospaǵanda) satyp alýdy usyndy", - dep habarlady aqparat ministrligi.
2021 jyldyń aqpanynda "Qazaqstan" RTRK"AQ men "Habar" agenttigi" AQ Silver spring media jáne Dentsu Inc-ke Tokiodaǵy XXXII Olimpiada oiyndary men Beijińdegi XXIV qysqy Olimpiada oiyndaryn transliatsiialaýǵa bailanysty baǵasyn usynýdy jáne ótken kezeńdegidei 5,1 million dollarǵa shart jasasý múmkindigin qarastyrýdy surap hat joldaǵan.
Aita keteri, 2016 jáne 2018 jyldardaǵy Olimpiada oiyndaryn kórsetýge tehnikalyq shyǵyndardy qosqanda 5,1 million dollar ketken.
"Alaida kompaniia bul usynysty elemei, hatty jaýapsyz qaldyrdy", - dedi ministrlik.
Degenmen quqyq ielerimen kelissózder jalǵasqan. Olimpiada oiyndary bastalar aldynda ǵana olar baǵany tómendetýge kelisken.
"2021 jyldyń 23 shildesinde Tokiodaǵy XXXII jazǵy Olimpiada oiyndaryn jáne Beijińdegi XXIV qysqy Olimpiada oiyndaryn tehnikalyq shyǵyndardy eskere otyryp, jalpy somasy 6,25 million dollarǵa transliatsiialaýǵa litsenziialyq quqyqty satyp alý týraly kelisimge qol qoiyldy", - dep naqtylady ministrlik.
Osyǵan bailanysty qazaqstandyqtar sportshy Eldos Smetovtyń alańǵa shyqqanyn otandyq telearna arqyly kóre almady.
"Quqyq ieleri tiisti tehnikalyq talaptardy berýden bas tartty, bul tikelei efir úshin tehnikalyq traktiler júrgizýge múmkindik bermedi. Transliatsiia synaq rejiminde buryn tekserilmegendikten, spýtniktik signaldardyń jiiligi men formaty sáikes kelmedi. Osyǵan bailanysty kesh qosylyp, tehnikalyq sebepterge bailanysty qazaqstandyq sportshy Eldos Smetovtiń beldesýi "Habar" telearnasynyń efirinde josparlanǵan ýaqytta kórsetilmedi", - dep túsindirdi ministrlik.
Keiin Smetovtiń oiyny jazba kúiinde kórsetildi.
Aqparat jáne qoǵamdyq damý ministrliginiń habarlaýynsha, 24 shilde keshke vedomstvo quqyq ielerimen jáne memlekettik telearnalarmen birlesip barlyq tehnikalyq máseleni rettegen. Sodan keiin transliatsiia arqyly qazaqstandyq sportshylardyń óneri kedergisiz kórsetilip keledi.
