Qazaqstandyq oqýshylar Ál-Ferǵani atyndaǵy fizika páni boiynsha birinshi halyqaralyq olimpiadada 11 medal jeńip aldy. Ulttyq quramanyń qorjynynda 2 altyn, 6 kúmis jáne 3 qola medal bar.
Olimpiada Ózbekstannyń Ferǵana qalasynda 8-13 qarasha aralyǵynda uiymdastyryldy. Ziiatkerlik baiqaýǵa 18 elden, sonyń ishinde Resei, Ázirbaijan, Belarýs, Rýmyniia jáne taǵy basqa elderden 130-ǵa jýyq oqýshy qatysty.
Ál-Ferǵani atyndaǵy fizika páni boiynsha halyqaralyq olimpiada eki kezeńde ótti. Birinshisi kezeńde — jazbasha jumystar, al ekinshisinde praktikalyq jumystar qaraldy.
Jeńimpazdardyń qatarynda, altyn medal — Álisher Erkebaev, Nurdáýlet Nazarbai, kúmis medal — Daniil Shatohin, Orazhan Haidar, Dinmuhammed Sapybek, Erdáýlet Nahyp, Bernar Shamgonov, Dias Espan, qola medal iegerleri — Beksultan Shárip, Asqar Qasymov, Nurjan Hasenov bar. Oqýshylar olimpiadadaǵy jeńisterin Qazaqstan Táýelsizdiginiń 30 jyldyǵyna arnap otyr.
«Olimpiadadaǵy básekelestik óte joǵary boldy, óitkeni qatysýshylardyń basym bóligi fizika boiynsha halyqaralyq olimpiada (IPhO) reitinginde aldyńǵy qatarda. Bizdiń balalar tamasha nátijeler kórsetip, Qazaqstandy álemdik arenada laiyqty kórsete bildi. Qazir bilim jáne ǵylym ministrliginiń «Daryn» ortalyǵy oqýshylarymyzdyń halyqaralyq olimpiadalarǵa qatysýyna jaǵdai jasaý úshin ártúrli deńgeidegi olimpiadalardy ótkizý boiynsha jumys istep jatyr», — dep atap ótti QR Bilim jáne ǵylym ministrligi Mektepke deiingi jáne orta bilim komitetiniń tóraiymy Gúlmira Kárimova.
