Foto: QR OAM
Qazaqstan mektepterine jasandy intellekt boiynsha jańa baǵdarlama engiziledi, dep habarlaidy Ult.kz.
Memleket basshysy Qasym-Jomart Toqaev 2026 jyldy Tsifrlandyrý jáne jasandy intellekt jyly dep jariialaý týraly tapsyrmasyna sáikes, QR Oqý-aǵartý ministrligi Massachusetts Institute of Technology (MIT) ýniversitetimen birlesip «Day of AI Qazaqstan» baǵdarlamasyn jalpy orta bilim berý júiesine engizýdi bastady.
Jańa bastama oqýshylarǵa jasandy intellekttiń qalai jumys isteitinin, onyń múmkindikteri men táýekelderin, sondai-aq ony qoldanýdaǵy jaýapkershilik máselelerin túsindirýge baǵyttalǵan. Sonymen qatar matematika, fizika, himiia, biologiia, jaratylystaný jáne informatika pánderin jasandy intellekt quraldaryn paidalaný arqyly oqytýdyń jańa tásilderi engiziledi. Bul oqytý protsesiniń praktikalyq baǵytyn kúsheitip, vizýalizatsiia múmkindikterin arttyrýǵa jáne jobalyq jumystardyń sapasyn jaqsartýǵa múmkindik beredi.
Baǵdarlama eki kezeńde júzege asyrylady. Alǵashqy kezeńde oqýshylar men muǵalimderdiń jasandy intellekt boiynsha bazalyq saýattylyǵyn qalyptastyrý kózdelgen. Oqý mazmuny jasandy intellekttiń negizgi uǵymdaryn, ony qoldaný mysaldaryn jáne etika máselelerin qamtidy. Pedagogterdi daiarlaý kaskadtyq model arqyly júrgiziledi: aldymen muǵalim kóshbasshylar oqytylyp, olar keiin MIT tarapynan sertifikat alyp, bilimderin áriptesterine taratady. Baǵdarlamany Qazaqstan jaǵdaiyna beiimdeý úshin Y. Altynsarin atyndaǵy Ulttyq bilim akademiiasy mamandary men sarapshylardan quralǵan jergilikti komanda jumys istep jatyr.
Ekinshi kezeńde barlyq synyptarǵa arnalǵan jasandy intellekt boiynsha tolyqqandy pánaralyq oqý baǵdarlamasy ázirlenedi. Joba qazaqstandyq pedagogter men MIT RAISE (Responsible AI for Social Empowerment and Education) komandasynyń birlesken jumysy arqyly júzege asyrylady. Baǵdarlama aldymen pilottyq rejimde synaqtan ótip, keri bailanys negizinde jetildiriledi. Ár oqý jylyna arnalǵan jasandy intellekt saýattylyǵy modýlderi 8–10 sabaqtan turady jáne bir toqsanǵa eseptelgen.
Sabaqtar IýNESKO jáne Ekonomikalyq yntymaqtastyq jáne damý uiymy ázirlegen halyqaralyq jasandy intellekt saýattylyǵy sheńberlerine sáikes esepteý jáne tsifrlyq baǵyttaǵy pánderge engiziledi. Kýrsty oqý protsesine tolyq engizý 2028 jyldyń tamyzyna deiin josparlanyp otyr.
Sonymen qatar baǵdarlamany iske asyrý úshin normativtik jáne ádistemelik baza ázirlenýde. Onyń aiasynda úlgilik oqý baǵdarlamalaryn jańartý, oqý-ádistemelik keshender daiyndaý, baǵalaý quraldaryn engizý, pedagogterdiń biliktiligin arttyrý jáne bilim sapasyn monitoringteý júiesin qalyptastyrý qarastyrylǵan.
