Elimizdiń Aýyl sharýashylyǵy ministrligi QR Prezidenti Qasym-Jomart Toqaevtyń Qytaiǵa sapary aiasynda aýyl sharýashylyǵy ónimderin eksporttaý máselesi boiynsha jasalǵan kelisimder jaiynda málimettermen bólisti, dep habarlaidy QazAqparat.
QR AShM Veterinarlyq baqylaý jáne qadaǵalaý komitetiniń basqarma basshysy Azamat Zabekovtiń aitýynsha, ótken jyly Túrkistanda túie sútin qaita óńdeitin zaýyt iske qosylǵan. Atalǵan óndiris oshaǵynyń jobalyq qýaty táýligine 100 tonnaǵa deiingi ónimdi quraidy.
«Bul jobanyń túie sharýashylyǵy men jylqy sharýashylyǵyn damytýda mańyzy óte zor. Túie sútin óńdep, keptirip, qytai naryǵyna eksportqa shyǵarý josparlanyp otyr. Joba Jambyl, Túrkistan jáne Qyzylorda oblystarynyń túie sútin óndirýshileriniń basyn biriktiretin bolady. Sonymen qatar Mańǵystaý oblysyndaǵy túieshilerimizdiń de múmkinshiligin jumyldyrý josparda bar. Ol jaqta sútti qurǵatatyn jeke tseh ashý josparlanǵan. Odan keiin qurǵaq sút zaýytqa ákelinip, qaptalyp, naryqqa jetkiziledi», - dedi Azamat Zabekov Aýyl sharýashylyǵy ministrliginde ótken brifingte.
Onyń aitýynsha, túie súti untaq túrinde eksportqa shyǵarylady.
«Barlyq tehnologiialyq qurylymy qazirdiń ózinde jasaqtalǵan. Jergilikti brend te quryldy. Aitalyq, »Saýmal« brendin Resei naryǵyna shyǵarýdamyz. Atalǵan ónimniń Qytai naryǵyndaǵy baǵasy joǵary. Menińshe, bul bizdiń fermerler úshin qosymsha tabys kózi bolmaq», - dedi ol.
Vedomstvo málimetinshe, Memleket basshysy Qasym-Jomart Toqaevtyń Qytaiǵa sapary aiasynda mal sharýashylyǵy ónimderi, sút ónimderi jún-teri boiynsha hattamaǵa qol qoiylǵan. Qol qoiylǵan hattamalar qazaqstandyq ónimderdi qytai naryǵyna shyǵarýǵa múmkindik beredi.
