QR Densaýlyq saqtaý ministriniń mindetin atqarýshy Jandos Búrkitbaev álemdegi jáne Qazaqstandaǵy epidemiologiialyq jaǵdaidy baiandady, dep habarlaidy QazAqparat.
«Álemde 275 millionnan astam koronavirýs juqtyrý jaǵdaiy tirkelgen. Táýligine 500 myńnan astam jaǵdai tirkelip, 5,3 millionnan astam adam qaitys boldy. Dúniejúzilik densaýlyq saqtaý uiymynyń Eýropalyq bóliginde 54 eldiń 15-inde sońǵy aptada syrqattanýshylyqtyń artqany baiqaldy. Sońǵy 14 kúnde Daniiada syrqattaný 70 paiyzdan asqan, Italiiada, Shvetsiiada – 50 paiyzdan, Frantsiia, Ulybritaniiada – 40 paiyzdan astam ósken, Novergiia men Portýgaliiada – 30 paiyzdan astam ósti», - dedi Jandos Búrkitbaev Úkimettiń búgingi otyrysynda.
Onyń aitýynsha, Qazaqstanda sońǵy aptada syrqattaný 31 paiyzǵa tómendedi. Álemdik reitingte Qazaqstan KVI-ge qarsy eki dozamen vaktsinalaý boiynsha 208 eldiń ishinde 103-orynda. Onyń ishinde TMD elderi arasynda Qazaqstan ekinshi orynda tur, halyq sanynyń 44,5 paiyzy vaktsinamen qamtylǵan.
«Respýblikada PTR testtiń oń nátijesimen 984 myńǵa jýyq jaǵdai jáne teris nátijesimen 83 myńǵa jýyq jaǵdai tirkelgen. Naýqastardyń 96 paiyzdan astamy jazylyp shyqty. 18 852 naýqas emdeýdi jalǵastyryp jatyr.
Jalpy Qazaqstanda sońǵy 4 aida syrqattaný 16 ese tómendedi, reprodýktivti sany – 0,9 jáne tamyz aiymen salystyrǵanda 1,2 ese tómendegeni baiqalady», - dedi J. Búrkitbaev.
