Densaýlyq saqtaý ministri Aleksei Tsoi eldegi aýrýhanalar virýsqa qarsy preparattarmen qalai qamtylyp jatqanyn aityp berdi, dep habarlaidy QazAqparat.
«COVID-19 patsientterine statsionarlyq kómek kórsetý qurylymy ózgertilip jatyr. 13 myń tósek orny bar karantindik statsionarlar provizorlyq jáne infektsiialyq emhana bolyp jasaqtalýda. Memleket basshysynyń tapsyrmasymen tósek oryndardyń sany 50 myńǵa kóbeitiledi. Keiingi úsh kúnniń ishinde koronavirýs juqtyrǵan azamattar úshin qosymsha 1,5 myń tósek orny jasaqtaldy. Al KVI juqtyrǵany jóninde kúdigi bar azamattarǵa 5 myń provizorlyq tósek orny ázirlendi», - dedi Aleksei Tsoi búgin OKQ-da ótken baspasóz máslihatynda.
Onyń aitýynsha, búgingi tańda 333 meditsinalyq uiymda 20 myń infektsiialyq tósek-oryn bar. Onyń kóbine pnevmoniiamen túskender jatqyzylýda.
«Ókpeni jasandy jeldetýdiń 3 myńǵa tarta apparaty bar statsionarlarda qosymsha 987 apparat satylyp alynady. Sonymen birge osyndai apparattyń taǵy 1 myńyn satyp alý kózdelýde. Odan bólek oksigeno-terapiiamen turaqty túrde qamtý úshin 4 myń ottegi kontsentratoryn satyp alý josparlanǵan. Jalpy koronavirýs infektsiiasy boiynsha naýqastardy tolyǵymen qamtý úshin statsionarlarda quny 138,8 mln teńgege 59 dári-dármek túri satyp alyndy. 2 shildedegi jaǵdai boiynsha óńirlerdegi meditsinalyq uiymdar 27 myń naýqasqa arnalǵan virýsqa qarsy preparattarmen qamtylǵan. Odan bólek 15 shildege deiin taǵy 28 myń naýqasqa arnalǵan dári-dármekti ákelý kózdelýde», - dedi ol.
Eske sala ketsek búgin QR Premer-Ministri Asqar Maminniń tóraǵalyǵymen ótken Memlekettik komissiia otyrysynda QR Prezidenti Qasym-Jomart Toqaevtyń tapsyrmasyna sáikes Qazaqstandaǵy epidemiologiialyq ahýaldy turaqtandyrý sharalary qaralǵan bolatyn. Memlekettik komissiianyń sheshimimen 5 shildeden bastap elimizde 14 kúnge qatań shekteý sharalary engiziletin boldy.
