Foto: Pexels.com
2024 jyldyń 1 qazanyna qarai Qazaqstan halqynyń sany 20 223 218 adamǵa jetti. Onyń ishinde qala turǵyndary – 12,7 million, al aýyl turǵyndary – 7,5 million adamdy quraidy. Jyl basynan beri halyq sany 189 376 adamǵa kóbeigen, dep habarlaidy Ult.kz Ulttyq statistika biýrosyna silteme jasap.
Jyldyń alǵashqy 9 aiynda elde 278,7 myń sábi dúniege kelse, 99,5 myń adam qaitys bolǵan. Tabiǵi ósim 179,2 myń adamdy qurady. Týý kórsetkishi boiynsha Túrkistan, Mańǵystaý oblystary jáne Shymkent qalasy aldyńǵy qatarda tur, al ólim kórsetkishi eń joǵary aimaqtar – Soltústik Qazaqstan, Shyǵys Qazaqstan, Qostanai oblystary.
Osy kezeńde 95 myń neke qiylyp, 29,3 myń ajyrasý tirkeldi.
Qazaqstanǵa kelýshiler sany 20 383 adamdy qurasa, elden ketkender sany 10 201 adamdy qurap, kóshi-qon aiyrymy 10 182 adamdy kórsetti. Elge kelgender sany ótken jylmen salystyrǵanda 6,5%-ǵa artsa, ketkender sany 19,9%-ǵa azaidy. El ishindegi kóshi-qon da ósip, óńiraralyq kóshi-qon boiynsha Astana, Almaty, Shymkent qalalary jáne Almaty oblysy halyq sanynyń oń aiyrymyna ie boldy.
