Qazaqstan eńbek ónimdiligi jaǵynan damyǵan elderden orta eseppen 5 ese artta qalyp otyr. Bul týraly QR Eńbek jáne halyqty áleýmettik qorǵaý vitse-ministri Erjan Birjanov aitty, dep habarlaidy QazAqparat.
«Qazaqstan eńbek ónimdiligi jaǵynan damyǵan elderden orta eseppen 5 ese artta qalyp otyr. Eńbek naryǵynyń usynystary tarapynan onyń ósýi úshin negizgi tejeýshi faktorlar mynalar: birinshi - jumys kúshi quzirettiliginiń tómen deńgeii. Ol eńbek naryǵyna qosylatyn jastarǵa da, qazirgi jumys kúshine de qatysty. Búgingi tańda eresekterdiń 79 paiyzy aqparattyq-kommýnikatsiialyq tehnologiialar salasynda qarapaiym daǵdylardy ǵana meńgergen», - dedi vitse-ministr Májiliste jumyskerlerdi qaita oqytý jáne olardyń daǵdylaryn turaqty jetildirý jónindegi jańa tásilderge arnalǵan dóńgelek ústel otyrysy barysynda.
Erjan Birjanovtyń aitýynsha, ekinshiden jumyskerlerdiń daǵdylaryn damytý úzdiksiz júrgizilmeidi.
«Tehnologiialar ózgergende, eńbek fýnktsiialary transformatsiialanǵanda eńbek resýrstary sol qalpyna qalyp otyr. Olardyń daǵdylary, ásirese, óndiristi jańartý kezinde jumys oryndaryna sai kelmeidi. Eresek turǵyndardyń tek qana 17 paiyzy óz biliktiligin arttyrady. Aita keter bolsaq, Ekonomikalyq yntymaqtastyq jáne damý uiymynyń baǵalaýynsha, basqa memleketterde osy kórsetkish 47 paiyzdy quraidy. Sondyqtan eńbek naryǵynda teńgerimge qol jetkizý osy jaǵdailardy eskerý qajet», - dedi ol.
