Foto: Gov.kz
Elimizde 2026–2030 jyldarǵa arnalǵan «Qazaqstan balalary» tujyrymdamasy júieli túrde iske asyrylyp jatyr. Qujat balalardyń qaýipsizdigin kúsheitýge, yqtimal qaýipterdiń aldyn alýǵa jáne olarǵa jan-jaqty qoldaý kórsetý júiesin jetildirýge baǵyttalǵan, dep habarlaidy Ult.kz.
Tujyrymdama aiasynda balalardy qorǵaý tetikterin jetildirý úshin jańa júielik tásilder engizilip, tsifrlyq quraldar keńinen qoldanylmaq. Qazirgi tańda Qazaqstanda 6,2 million otbasy bar, onyń shamamen 3 milliony – balaly otbasylar. Otbasylardy qoldaý maqsatynda el boiynsha 131 otbasyny qoldaý ortalyǵy jumys isteidi.
Baǵdarlama aiasynda otbasy institýtyn nyǵaitýǵa baǵyttalǵan birqatar jańa bastama qarastyrylǵan. Atap aitqanda, nekege deiingi keńes berý júiesin damytý, ata.ana.kz platformasynda jaýapty ata-ana bolýǵa arnalǵan interaktivti kýrstar ótkizý, «Ata-analar akademiiasy» jobasyn keńeitý, sondai-aq ata-analardyń balanyń mektep ómirine qatysýyn zańnamalyq turǵyda bekitý josparlanyp otyr.
Sońǵy jyldary jetim balalardy qoldaý baǵytynda da oń ózgerister baiqalǵan. Sońǵy 10 jylda balalar úilerindegi tárbielenýshiler sany 54%-ǵa azaiyp, internat uiymdarynyń jelisi 24%-ǵa qysqarǵan. Al 2025 jyly shamamen 3 myń jetim bala otbasylarǵa ornalastyrylǵan.
Balalardyń qaýipsizdigin arttyrý úshin bilim berý uiymdarynda jasandy intellekt negizindegi beinebaqylaý júielerin engizý bastaldy. Bul tehnologiia agressiia, janjal nemese býlling jaǵdailaryn erte anyqtaýǵa múmkindik beredi. Qazirdiń ózinde mundai júie 46 mektep pen 8 balabaqshada qoldanysqa engizilgen. Al Astanadaǵy №107 mektepte pilottyq joba iske asyrylyp jatyr.
Sonymen qatar zorlyq-zombylyqtan zardap shekken balalarǵa kómek kórsetý úshin elimizdiń barlyq óńirinde arnaiy mamandandyrylǵan kómek kabinetterin ashý josparlanǵan. Onda qyzmetter «bir tereze» qaǵidaty boiynsha kórsetilip, balaǵa psihologiialyq kómek, saraptama jáne mamandardyń qatysýymen saýalnama alý siiaqty barlyq qajetti qyzmetter bir jerde usynylady.
Budan bólek, mektepterde táýekel tobyna jatatyn balalardy erte anyqtaýǵa arnalǵan pedagogikalyq súiemeldeý júiesi engiziledi. Árbir bala úshin pedagogter, mektep psihologtary jáne ata-analardyń qatysýymen jeke profilaktikalyq jospar ázirlenbek.
Balalar jaraqatynyń aldyn alý maqsatynda «Balalar qaýipsizdigi terezesi» respýblikalyq aqparattyq aktsiiasy da ótkizilmek. Ol balalardyń terezeden qulap ketý jaǵdailaryn azaitýǵa jáne ata-analardyń jaýapkershiligin arttyrýǵa baǵyttalǵan.
Aldaǵy ýaqytta memlekettik qoldaý sharalaryn tsifrlandyrý aiasynda mGov platformasynda «Balanyń joly» atty jańa tsifrlyq júie iske qosylady. Bul júie balalarǵa arnalǵan memlekettik qyzmetterdi bir jerge biriktirip, túrli vedomstvolardyń úilesimdi jumysyn qamtamasyz etpek.
Aita keteiik, 2026–2030 jyldarǵa arnalǵan «Qazaqstan balalary» tujyrymdamasy biyl qańtar aiynda Úkimettiń sheshimimen bekitildi. Bul qujat balalardyń quqyqtaryn qorǵaý men qaýipsizdigin qamtamasyz etýge baǵyttalǵan alǵashqy biryńǵai strategiialyq baǵdarlama sanalady. Tujyrymdamada 158 is-shara men 10 negizgi indikator qarastyrylǵan.
