Búginnen bastap elimizdiń aýmaǵynda jol qaýipsizdigi ailyǵy bastaldy. Bul týraly QR IIM Ákimshilik politsiia komiteti tóraǵasynyń orynbasary Jandos Muratáliev málim etti, dep habarlaidy QazAqparat.
«El aýmaǵynda 18 shildeden bastap jol júrisi qaýipsizdigi ailyǵy bastaldy. Osynyń aiasynda politseiler ótkizetin búkil is-sharalardyń basym baǵyty – jol-kólik oqiǵalaryn azaitý, joldaǵy qaýipsizdikti arttyrý jáne jol júrisine qatysýshylardyń ómiri men densaýlyǵyn saqtaý úshin azamattardyń nazaryn avtojoldardaǵy jaraqattaný problemalaryn sheshýge baǵyttaý», - dedi ol ministrliktiń baspasóz alańynda ótken brifingte.
Onyń atap ótýinshe, jazǵy demalys kezeńinde jáne demalys maýsymynda qalaaralyq jáne aimaqaralyq qatynastardaǵy kólik quraldarynyń trafigi dástúrli túrde ósedi.
Sonymen qatar ol kezeńde saldary eń qaiǵyly jaǵdaiǵa ákep soqtyratyn jol-kólik oqiǵalarynyń ósý qaýpi de artady.
«Osyǵan bailanysty, is-shara aiasynda politseiler patrýldeý kezinde, avtokólik quraldaryn, onyń ishinde jolaýshylar kóligin tekserýdi kúsheitedi. Jol-kólik oqiǵalarynyń negizgi sebepteri, birinshi kezekte, júrgizýshilerdiń tártipsizdigi sanalady. Sonyń saldarynan qarama-qarsy júris jolaǵyna shyǵý, qozǵalys jyldamdyǵyn arttyrý, manevr jasaý qaǵidalary buzý, sonymen qatar, kólikti kóp jaǵdaida sharshańqy kúide basqarý degen siiaqty quqyq buzýshylyqtar oryn alady. Bul rette balalardyń avtomobil salonynda bolýy júrgizýshilerdi jol júrisi qaǵidalaryn buzýdan toqtata bermeidi», - dedi Jandos Muratáliev.
