El Qarýly Kúshteriniń quramalary men áskeri bólimderinde 2021 oqý jylyn qorytyndy tekserý bastaldy. Bul kezeń qazan aiynyń sońyna deiin jalǵasady, dep habarlaidy "Ult aqparat" Qorǵanys ministrliginiń baspasóz qyzmetine silteme jasap.
Qorytyndy tekserýdiń maqsaty áskerlerdiń jaýyngerlik jáne jumyldyrý daiyndyǵynyń naqty jai-kúiin, jeke quramnyń daiarlyq deńgeiin aiqyndaý, sondai-aq komandirlerge kúndelikti jáne jaýyngerlik oqý-jattyǵý qyzmetin uiymdastyrý jumystarynyń túrlerin, ádisterin jetildirýde is júzinde qoldaý kórsetý bolyp tabylady.
Bas shtabtyń, Qarýly Kúshter túrleri bas qolbasshylarynyń, óńirlik qolbasshylyqtar áskerleriniń jáne ásker tekteri qolbasshylarynyń, áskeri bólimder komandirleriniń komissiialary 400-den astam qurama men bólimdi tekseredi.
Áskeri qyzmetshiler taktikalyq, arnaiy, atys, saptyq, dene shynyqtyrý jáne daiyndyqtyń basqa da túrlerin qamtityn jaýyngerlik daiarlyqtyń negizgi pánderinen, sol siiaqty mashinalar men avtomobil tehnikasyn júrgizý, radiatsiialyq, himiialyq jáne biologiialyq qorǵaý, áskeri topografiia boiynsha synaqtar tapsyrady.
Qorytyndy tekserý nátijelerine qarai árbir áskeri qyzmetshi jeke-jeke baǵalanatyn bolady. Sondai-aq bul áskeri bólimderge de qatysty.
