Foto: t.me/kazakhmys_news
«Qazaqmysta» 2026-2028 jyldarǵa arnalǵan mineraldyq-shikizat bazasyn damytý jáne óndiristik qyzmet jospary bekitildi. Kompaniia qordy tolyqtyrý jáne jumys istep turǵan kásiporyndarda turaqty óndiristi qamtamasyz etý baǵytynda jumys júrgizýde.
Búgingi tańda kenniń jiyntyq qory 551,8 mln tonnany quraidy. Bul qor óndiristi shamamen 16 jyl qamtamasyz etýge jetedi dep baǵalanýda. Osyǵan bailanysty resýrstyq bazany keńeitý jáne ken oryndarynyń paidalaný merzimin uzartý basym baǵytqa ainalýda.
2026-2028 jyldar aralyǵynda ken qory 365 mln tonnaǵa artady dep kútilýde. Sondai-aq mystyń balanstyq qory 2 328 tonnaǵa ulǵaiady dep boljanýda.
Barlaý jáne baǵalaý jumysy Jezqazǵan, Qaraǵandy jáne Balqash óńirlerinde, sondai-aq qoldanystaǵy nysandardan 100-200 shaqyrym radiýstaǵy jańa ýchaskelerde júrgizilýde. Mundai ádis igerilgen aýmaqtarǵa jaqyn jerde infraqurylymdy damytýǵa jáne investitsiialyq táýekeldi tómendetýge múmkindik beredi.
Qordy ulǵaitý jumysy óndiristik baǵdarlamamen tikelei bailanysty. 2026 jyly 31,7 mln tonna ken óndirý, 33,1 mln tonna ken óńdeý jáne 254,6 myń tonna mys kontsentratyn shyǵarý josparlanǵan.
Sonymen qatar damý jáne jańǵyrtý jobalary iske asyrylýda. Jezqazǵan óńirinde «Jylandy» jáne «Jomart» kenishterin keńeitý jumysy jalǵasýda. Jezqazǵan ken ornynda (ShJK, OJK, BJK) injenerlik kommýnikatsiialardy kóshirý jáne geologiialyq barlaý jumysyn eskere otyryp, óndiris kólemi turaqtandyrylýda.
«Qusmuryn» kenishinde jumysty qaita bastaý qarastyrylýda, bul Karaǵaily fabrikasyn aldaǵy 10 jylda shikizatpen qamtamasyz etýge múmkindik beredi. «Nurqazǵan» kenishin damytý jumysy júrgizilýde, Shatyrkól-Jaisań klasteriniń tómengi qabattarynda qorlardy ashý jumystary jalǵasýda.
Balqash óńirindegi «Qońyrat» kenishinde jumysty jańǵyrtý josparlandy. 2022-2025 jyldary júrgizilgen geologiialyq barlaý jumysynyń qorytyndysynda Saiaq ken ornynda 10 mln tonna ken qory rastaldy. Bul onyń paidalaný merzimin 2031-2042 jyldarǵa deiin uzartýǵa múmkindik beredi.
Joba tek óndirý kólemin qamtamasyz etý úshin ǵana emes, sonymen qatar taý-ken jumysyn turaqtandyrýǵa baǵyttalǵan. Geomehanikalyq turaqtylyq pen jabdyqty jańǵyrtý erekshe nazarǵa alynýda, bul birqatar ken oryndarynyń paidalaný merzimin 2032-2052 jyldarǵa deiin uzartýǵa múmkindik beredi.
Osylaisha, kompaniia damýdyń keshendi modelin quryp, qoryn tolyqtyrady, qoldanystaǵy qýatyn jańartady jáne jańa nysandardy iske qosady. Qordy arttyrý jáne kenishterdi jańǵyrtý jumysy bolashaqta ken óndirý jáne óńdeý kólemin turaqty ustap turýǵa múmkindik beredi. Óndiristik baǵdarlama kásiporyndardyń ondaǵan jyldardaǵy turaqty jumysyn esepke ala otyryp qurylady.
