Foto: Qazaqkontsert
Roza Baǵlanova atyndaǵy «Qazaqkontsert» memlekettik akademiialyq kontserttik uiymynda Qazaq memlekettik simfoniialyq orkestriniń «PAGANINI & BRUCH» atty mýzykalyq keshi ótti.
Kontsert italiialyq uly skripkashy jáne kompozitor Nikkolo Paganinidiń shyǵarmasymen ashyldy. Kesh baǵdarlamasynda kórermen nazaryna Nikkolo Paganinidiń ckripka men orkestrge arnalǵan №1 kontserti jáne «Venetsiialyq karnaval» shyǵarmasy, sondai-aq, Maks Brýhtyń úsh bólimnen turatyn kontserti usynyldy.
Mýzykalyq keshke Saǵadat Omarǵazin jáne Davide Alonia qatysty. Saǵadat Omarǵazin – respýblikalyq jáne baiqaýlardyń laýreaty, Avstriiada ótken Bethoven atyndaǵy XIX halyqaralyq skripkashylar baiqaýynyń jeńimpazy. Qazirgi ýaqytta ol Kúlásh Baiseiitova atyndaǵy Qazaq ulttyq óner ýniversitetiniń mamandandyrylǵan mýzykalyq mektepte Qazaqstannyń Halyq ártisi, professor Aiman Musahadjaevanyń jetekshiligimen bilim alýda. S. Omarǵazin eldiń aspaptyq ónerin damytýǵa eleýli úles qosyp, iri kontserttik jobalarǵa qatysady jáne akademiialyq mýzykany keń aýditoriiaǵa nasihattap júr. Kesh dirijery - Bahytjan Mýsahodjaeva.
Sondai-aq, is-sharada Eýropanyń mýzykalyq akademiialarynda joǵary baǵaǵa ie bolǵan italiialyq skripkashy Devide Alonianyń virtýozdy oryndaýy erekshe atmosfera syilady. Álemdik sahnalarda tanymal bolǵan ol Italianyń eń úzdik skripkashylarynyń biri. Sonymen qatar Nataliia Gýtman, Eliso Virsaladze, Brýno Kanino, Djeffri Svan, Enriko Pache, Roberto Proseda sekildi uly mýzykanttarmen birge bir sahnada óner kórsetti. Maestro Djýliano Karminola ony «tańǵajaiyp talant iesi» dep atap ótti. Sienadaǵy Chigiana akademiiasynyń arnaiy syilyǵymen marapattalǵan.
Aita keteiik, mýzykalyq kesh barysynda Saǵadat Omarǵazinge Qazaqstan Respýblikasynyń Mádeniet jáne aqparat ministri Aida Ǵalymqyzy Balaevanyń alǵys haty joldandy. Hatty Qazaqstan Respýblikasy Mádeniet jáne aqparat ministrligi Mádeniet komitetiniń tóraǵasy Erlan Erǵazyuly Dákenov tabystady.
