.jpeg)
Foto: Qazaqkontserttiń baspasóz qyzmetinen
Roza Baǵlanova atyndaǵy «Qazaqkontsert» memlekettik akademiialyq kontserttik uiymynda tanymal kompozitor Qýat Shildebaevtyń «Otan Ana» shyǵarmashylyq keshi ótti.
Kontserttik baǵdarlamada «Qairan kóńil», «Saǵym dúnie», «Otan Ana», «Jan Ana», «Keshir meni», «Amanat», «Aialaǵan arman-ai», «Sáýle» ánderi jáne tanymal kinofilmderden alynǵan mýzykalyq shyǵarmalar oryndaldy.
Is-sharaǵa Qazaqstannyń eńbek sińirgen qairatkerleri Ardaq Balajanova, Renat Gaisin, Dilnaz Ahmadieva, Dáýren Serǵazin, Janar Dýgalova, «Eren eńbegi úshin» tósbelgisiniń iegeri Anna Ývarova, talantty ánshiler Qairat Baekenov, Marsel, Shaba Ádenqulqyzy, daryndy qobyzshy Oljas Qurmanbek, respýblikalyq jáne halyqaralyq baiqaýlardyń laýreattary Erbol Tájibaev, Didar Ábdýhalyq, Nurai Sherý, Ali Okapov, Mádi Rymbaev, Gaýhar Ómirzaqova jáne Aqmarjan Qurmanbek qatysty.
Fotolar: Qazaqkontserttiń baspasóz qyzmetinen
Bul kesh – Qýat Shildebaevtyń alǵashqy jeke shyǵarmashylyq keshi. Is-shara barysynda kompozitordyń týyndylary «Saz&Soul» toby men «Astana» estradalyq-simfoniialyq orkestriniń súiemeldeýimen oryndalyp, onyń mýzykasyna jańa qyrynan úńilýge múmkindik berdi.
Qýat Shildebaev – tanymal kompozitor, halyqaralyq jáne respýblikalyq baiqaýlardyń laýreaty. Ol simfoniialyq, kameralyq, hor, halyq aspaptaryna jáne kinofilmderge arnalǵan shyǵarmalardy jazdy. Onyń týyndylary «Otyrardyń kúireýi», «Qosh, Gúlsary», «Balalyq shaǵymnyń aspany», «Shal» sekildi filmderde paidalanylǵan.
2025 jyly AQSh-ta «Global Music Partnership Press» baspasy kompozitordyń jeke skripka men ishekti ansamblge arnalǵan «Qarakemer» kúiin jaryqqa shyǵardy. Osylaisha, kompozitor shyǵarmasy amerikalyq basylymda jariialanǵan Qazaqstannyń alǵashqy ókili atanyp, bul onyń halyqaralyq deńgeide tanylýyndaǵy mańyzdy kezeńge ainaldy.
«Qarakemer» kúii Qazaqstannyń Niý-Iorktegi Bas konsýldyǵynyń qoldaýymen Niý-Iork qoǵamdyq kitaphanasynyń qoryna engizildi. Shyǵarmanyń premerasy Garvard ýniversitetinde jáne Bostondaǵy Beineleý óneri mýzeiinde ótti.
