«Qazaqfilm» kinostýdiiasy janynan «Qazaq animatsiia» shyǵarmashylyq birlestigi qurylady. Bul týraly Aqparat jáne qoǵamdyq damý vitse-ministri Bolat Tilepov Túrkistanda ótip jatqan ÁMEN kinofestivalinde aitty, dep habarlaidy QazAqparat.
«Animatsiia óneri arqyly óskeleń urpaqty tárbieleý – ulttyq «Rýhani jańǵyrý» jobasynyń mańyzdy mindetteriniń biri. Ózderińizge málim, alǵashqy qazaq mýlttýyndysynyń jaryq kórgenine biyl 54 jyl toldy. Osy ýaqyt ishinde ulttyq animatsiianyń jetken jetistigi de, kóterilgen biigi de az emes. Eń bastysy, talai talanttar ósip, ulttyq mektep qalyptasty. Dese de, zaman kóshi ilgeri ketýde. Oǵan ilesý úshin bizdiń elimizde barlyq múmkindik bar. Bilimi men biligi mol shyǵarmashyl jastar, mamandyq násibin paidaly kásipke ainaldyrǵan jekemenshik stýdiialar, jańa ideialar men tyń bastamalar jáne, eń bastysy, osy eńbekti tutynýǵa daiyn ulan-ǵaiyr el, jasampaz aýditoriia bar», - dep atap ótti vitse-ministr.
Óz sózinde Bolat Tilepov memlekettik tapsyrysty tiianaqty retteitin, maqsatty jumsaityn júie joq ekenin alǵa tartty. Sol sebepti animatsiiamen ainalysatyn shyǵarmashylyq toptardy qoldaýdyń jańa júiesi qurylmaq.
«Sondyqtan da kelesi jyldan bastap, jańadan qabyldanǵan ulttyq joba aiasynda «Qazaqfilm» kinostýdiiasy janynan «Qazaq animatsiia» shyǵarmashylyq birlestigi óz jumysyn bastaidy. Onyń negizgi mindeti – ulttyq animatsiia naryǵynda júrgen shyǵarmashyl toptarǵa bir ortalyqtan qoldaý bolyp, otandyq ónimniń órisin keńeitýge jaǵdai jasaý. Ekinshiden, animatsiia ónerin tek balalar kontenti retinde emes, kino men jarnamanyń, kompiýterlik oiyndar men veb-kommýnikatsiia tiline ainaldyrý arqyly tolyqqandy ulttyq aqparattyq resýrs qalyptastyrý. Úshinshiden, árine álemdik mýltindýstriia ókilderimen, onyń ishinde búgingi festivalge qatysyatyn sheteldik áriptestermen tyǵyz bailanys ornatyp, qazaq animatsiiasyn halyqaralyq dárejege kóterý», – dedi B. Tilepov.
Aita keteiik, 29-30 qazan kúnderi Túrkistanda Qazaqstan, Ázerbaijan, Bashqurtstan (RF), Qyrǵyzstan, Ózbekstan, Tatarstan (RF), Tájikstan men Túrkiianyń bilikti mýltiplikatorlaryn bir alańǵa jiǵan ÁMEN animatsiialyq kinofestivali ótedi. Festival aiasynda qala kórermenderi túrki elderiniń úzdik mýltfilmderin tegin tamashalap, animatsiialyq joba jasaýdyń qyr-syryna qanyǵady.
