Foto: masa.media
Qazaqstanda qazaq qyzdaryna qatysty aitylǵan qorlaý sózderden keiin 15 táýlikke qamaýǵa alynǵan reseilik strimer Anar Abdýllaev bostandyqqa shyqqan soń kópshilikke videoúndeý joldady. Bul jóninde Ult.kz habarlady.
Úiine oralǵan strimer óziniń Telegram-arnasynda jariialaǵan beinejazbasynda qazaq halqynan keshirim surap, bolǵan jaittyń munshalyqty ýshyǵyp ketkenine áli de sener-senbesin bilmeitinin aitty. Ol áriptesi Renatpen birge qiyn kezeńdi bastan ótkergenin atap ótip, ózderine qoldanylǵan jazany oryndy dep qabyldaitynyn jetkizdi.
Anar Abdýllaevtiń sózinshe, eshkimdi ádeii renjitý nemese qoǵamda jaǵymsyz pikir týǵyzý maqsaty bolmaǵan. Ol qazaq halqynan taǵy da keshirim surap, osy jaǵdai kezinde qoldaý bildirgen azamattarǵa rizashylyǵyn bildirdi.
"Barsha qazaq halqynan taǵy da keshirim ótinemin. Jaǵdaidyń osylai shielenisip ketkenine ókinish bildiremin. Eshkimdi qapalandyrý nietim bolǵan joq. Men dostyq qarym-qatynasty qadirleimin. Qoldaý kórsetkenderdiń bárine alǵys aitamyn. Qazir úidemin", – dedi strimer.
Eske sala keteiik, biyl aqpan aiynyń basynda Almaty qalasynda “STAYA” tobynyń músheleri – Anar Abdýllaev pen Renat Pashaev 15 táýlikke ákimshilik qamaýǵa alynǵan edi. Tikelei efir barysynda olar qazaqstandyq kórermendermen sózge kelip qalǵan. Daýdyń týyndaýyna strim kezinde qazaq qyzdaryna baǵyttalǵan qorlaý sózder sebep bolǵan.
Oqiǵadan keiin Ázerbaijan tarapynan ókilder jaǵdaiǵa bailanysty ókinish bildirip, strimerlerdiń aitqan sózderi úshin keshirim surady. Sonymen qatar olar Qazaqstanǵa degen qurmettiń erekshe ekenin atap ótti.
