Jambyl oblysynda qazaq-qyrǵyz shekarasyndaǵy «Qordai» ótkizý beketin rekonstrýktsiialaý jumysy jalǵasyp jatyr. Beket kelesi jyldyń ózinde táýligine 2500 kólik pen 23 myń adamdy ótkize alady, dep habarlaidy "Ult aqparat" Indýstriia jáne infraqurylymdyq damý ministrligine silteme jasap.
Joba boiynsha uzyndyǵy 137 metrlik 8 jolaqty qozǵalys bóligin, ótkizý terminaldaryn, baqylaý-ótkizý pýnktin, shekara qyzmetiniń ǵimaraty men ótkizý beketiniń basqa da nysandaryn qaita jańartylady.
«Budan bólek, biyl mamandar tekserýdi jyldam júrgizýge arnalǵan jańa inspektsiialyq tekserý keshenin salady. Búgingi tańda qurylys jumystaryna qajetti tehnikanyń barlyǵy jumyldyrylyp, qurylys materialdary jetkizilgen. Qaita jańartý jumystaryna 127 adam men 15 tehnika tartyldy. Ótkizý beketiniń rekonstrýktsiia aýdany - 3,5 ga. Jobanyń bas merdigeri – «Dorstroi» JShS. Tehnikalyq baqylaýdy «Almaty Sapa Injiniring» JShS júzege asyrady. Joba avtory – «Sintez» JShS» delingen habarlamada.
Jol-qurylys maýsymy qyzǵan shaqta «Qordai» ótkizý beketi tek jaiaý júrginshiler úshin saǵat 6:00-dan 24:00-ke deiin jumys isteidi.
Avtokólikter kórshiles «Qarasý», «Sortóbe» jáne «Aýqatty» beketteri arqyly ótkizilip jatyr. Atalmysh ótkizý beketterine kirý joldary jaqsy jaǵdaida. Bekettegi jóndeý jumystaryn osy jyldyń sońyna deiin aiaqtaý josparlanyp otyr.
