Qazaq KSR bilim berý ministri bolǵan, bilim berý salasynyń ardageri Qajahmet Balahmetov dúnieden ozdy. Qaraly habardy QR Bilim jáne ǵylym ministri Ashat Aimaǵambetov jetkizdi, dep habarlaidy "Ult aqparat".
«Búgin otandyq bilim berý isiniń korifeii, Qazaq KSR bilim berý ministri bolǵan Qajahmet Balahmetov ómirden ótkendigi týraly sýyt habar jetip, kóńildi qulazytty.
Qajahmet Balahmetuly elimizdiń bilim berý salasyn damytýǵa baǵa jetpes úles qosqan adam. Bul salany 13 jyldan astam basqarǵan ol balalar men jastardy oqytý máselesine erekshe nazar aýdaratyn.
Sońǵy ret Qajahmet Balahmetovpen biyl jazda 95 jas mereitoiymen quttyqtap barǵanymda kezdesip edik. Ol únemi bilim berý isindegi jańalyqtardy qadaǵalap, óz tájiribesimen bólisip otyratyn.
Qajahmet Balahmetulynyń týǵan-týystary men jaqyndaryna qaiǵylaryna ortaqtasyp, kóńil aitamyn», - dep jazdy Aimaǵambetov Facebook-paraqshasynda.
Qajahmet BALAHMETOV 1926 jyly 26 maýsymda qazirgi Aqmola oblysynda dúniege kelgen.
1948 jyly QazMÝ-dy (qazirgi ál-Farabi atyndaǵy Qazaq ulttyq ýniversitetin) bitirgen.
1948 — 1952 jyldary – Syrymbet orta mektebiniń muǵalimi.
1953 — 1957 jyldary – Eńbekshilder aýdany Makinsk jáne Stepniak orta mektepteriniń direktory.
1957 — 1960 jyldary – Kókshetaý oblysy Halyqqa bilim berý bólimi meńgerýshisiniń orynbasary, 1968 — 1980 jyldary – meńgerýshisi.
1970 — 1974 jyldary – Qazaqstan Kompartiiasy OK-niń Ǵylym jáne bilim berý mekemeleri bólimi meńgerýshisiniń orynbasary.
1974 — 1987 jyldary – Qazaq KSR Oqý-aǵartý ministri qyzmetterin atqarǵan. Bilim berý máselelerine arnalǵan 70-ten asa eńbegi jaryq kórdi. Úsh márte Eńbek Qyzyl Tý ordenimen jáne medaldarmen, tósbelgilermen jáne gramotalarmen marapattalǵan.
