Foto: ashyq derekkóz
Memleket basshysy bolashaqqa senimmen qadam basý úshin tól tarihymyzdyń aýqymy keń ekenin tolyq sezinip, mádeni muramyzdy saqtap, ony dáripteýimiz qajet dep sanaidy. Onyń pikirinshe, Qazaqstan – Uly daladaǵy kóshpendiler órkenietiniń tikelei murageri. Jer júzine Altyn Orda degen atpen tanylǵan áigili Joshy ulysy Ortalyq Eýraziianyń baitaq dalasyndaǵy eń qýatty memleket retinde moiyndalǵan.
Joshy áýleti 6 ǵasyr boiy Ortalyq Eýraziianyń taǵdyryna tikelei yqpal etti. Ulan-ǵaiyr aýmaqta birtutas órkeniet qurýǵa umtyldy. Joshy ulysy Uly dalany meken etken halyqtardyń san ǵasyrlyq damý baǵdaryn aiqyndap otyrdy. Ulyq ulys memleketti basqarý isin jańa deńgeige kóterdi. Onyń Rim imperiiasymen uqsastyǵy da – osynda. Biyl Joshy ulysynyń negizi qalanǵanyna 800 jyl toldy. Búgingi jiynymyz da osy mereili beleske tuspa-tus kelip otyr. Joshy ulysy Qazaqstannyń memlekettilik dástúrinde airyqsha oryn alady. Elimizdiń ótkeni, búgini men bolashaǵy onyń tarihi murasymen tyǵyz astasyp jatyr. Endeshe, Altyn Orda týraly halyqaralyq arenadaǵy túsinik Qazaqstanmen tikelei bailanysty bolýy kerek.
Bul týraly Memleket basshysy Ulttyq quryltaida aitty. Ulttyq quryltaidyń memleket tarihyndaǵy róli erekshe. Ol ultty uiysýǵa shaqyrady. Ata-babalarymyzdyń jolyn jalǵaidy. Sebebi babalarymyz mańyzdy máselelerdi osyndai alqaly jiynda talqylaǵan. Mundai sheshimder búkil eldi biriktirgen. Al ulttyq ideologiia osyndai sheshimder arqyly qalyptasady.
«Shyn máninde, qazaqtyń mádenieti san túrli salany qamtidy. Halqymyzdyń ata-babadan miras bolǵan mol murasy bar. Ony zaman talabyna sai jańǵyrtyp, jer júzine nasihattaý kerek», - dedi Memleket basshysy.
