Foto: ashyq derekkóz
Qazaqstannyń «Oskar» júldesine usynǵan «Kadet» filmi bedeldi syilyqtyń «Halyqaralyq kórkem film» nominatsiiasynan alynyp tastaldy, dep habarlaidy Ult.kz.
Filmniń prodiýseri Erlan Býharbaevtyń aitýynsha, mundai sheshim «Oskar» akademiiasynyń ákimshiligi tarapynan qabyldanǵan.
Basty sebep – Liga kinematografisteriniń haty. Onda filmniń operatory Erkinbek Ptyralievtiń ulttyq irikteý komissiiasynyń quramynda bolǵany jáne óz filmi úshin daýys berýi múmkin ekeni aitylǵan.
«Bul shyndyqqa janaspaidy, buǵan resmi dálel de bolǵan. Alaida ne istei alamyz? Repýtatsiialyq táýekelderge silteme jasaǵan Liga basshysynyń jeke unatpaýshylyǵy óz degenine jetti», – dep jazdy prodiýser áleýmettik jelide.
Al Liga kinematografisteri óz kezeginde aiyptaýlardy joqqa shyǵaryp, olardyń maqsaty tek ashyqtyq pen ádildikti saqtaý bolǵanyn málimdedi.
«Biz filmge nemese jeke adamdarǵa qarsy bolǵan joqpyz. Másele – kásibi etika men ashyq sheshim qabyldaý printsipterin saqtaý jaiynda. Qazaqstandyq kino halyqaralyq deńgeide moiyndalýǵa laiyq, biraq bul úshin ádildik pen kórermenge, avtorlarǵa, el bedeline degen qurmet qajet», – delingen resmi jaýapta.
Alaida ótinim qabyldaý merzimi aiaqtalǵandyqtan, Qazaqstan endi 2026 jylǵy «Oskar» baiqaýyna qatysa almaidy. Bul el kinosy úshin úlken múmkindik pen nominatsiiadan aiyrylý degen sóz.
Máselege aktrisa Dariǵa Badyqova pikir bildirdi.
«Kadet filmi – elimiz atynan Oskarǵa joldama alǵan alǵashqy úmitkerlerdiń biri edi. Ókinishtisi, sol qýanyshty sátti biz óz ishimizdegi kórealmaýshylyqpen kólegeilep aldyq. Shyndyǵynda, bul tek bir filmniń taǵdyry emes, bizdiń ónerge degen kózqarasymyzdyń ainasy boldy… Ónerde jeńilis te, jeńis te – ortaq. Qýanbasaq, qoldamasaq – eshqashan biikke shyǵa almaimyz. Qazaq kinosy – bizdiń rýhani qazynamyz, al ony kóterý – árqaisymyzdyń mindetimiz. Men ózime kezinde senim artqan adamǵa qazir qoldaý bildirýdi paryz sanaimyn. Óitkeni men senemin: qazaq kinosynyń kúshi – birlikte, bolashaǵy – qoldaýda, rýhy – ádildikte», - dedi Dariǵa Badyqova.
Aita keteiik, «Kadet» filmi rejisser Ádilhan Erjanovtyń týyndysy. Kartina 2024 jyly Tokio halyqaralyq kinofestivalinde kórsetilgen, al Qazaqstandaǵy premerasy 2025 jyldyń qańtarynda ótken bolatyn.
Ótken jyly el atynan «Baýyryna salý» filmi usynylǵan, al 2023 jyly múlde birde-bir týyndy jiberilmegen edi.
