Jarylystan zardap shekken birde-bir adam kómeksiz qalmaidy. Bul týraly Jambyl oblysynyń ákimi Berdibek Saparbaev málimdedi, dep habarlaidy Sputnik Qazaqstan.
"Zań boiynsha tótenshe jaǵdai kezinde zardap shekkenderge memlekettik kómek pen qoldaý sharalary qarastyrylǵan. Budan bólek, demeýshiler men jergilikti biýdjettiń esebinen qaitys bolǵandardyń otbasylaryna kómek beriledi", - dedi Saparbaev arnaiy brifingte.
Ákiminiń aitýynsha, búgin tańerteń Baizaq aýdandyq ákimdiginiń mamandary áskeri qoimaǵa jaqyn turǵan úsh aýyldy aralap, jarylystardan zardap shekken úilerdi qarap shyqty.
"Ol jaqta janyp ketken úiler joq. Tek shatyrlarǵa zaqym tigen. Sonyń ózinde shifer ǵana, sosyn terezelerdiń shynysy men esikter synǵan. Biz arnaiy komissiia qurdyq. Olar árbir úidi zerdelep, qansha úidiń zardap shekkenin anyqtaidy. Sol kezde zań boiynsha bárin qalpyna keltiretin bolamyz. Jarylystardan zardap shekken birde-bir adam kómeksiz qalmaidy", - dep atap kórsetti aimaq basshysy.
Osy oraida Saparbaev áleýmettik jelide tarap jatqan alypqashpa áńgimege senbeýge shaqyrdy.
"Shuǵyl shtab bar. Sol jerden naqty aqparat alýǵa bolady. Al jalǵan málimetke senbeńizder. Áitpese, keshe túnde "10 myń adamdy evýaktsiialady, ondaǵan adam qaitys boldy, bálenbai úi órtendi" degen áńgimeler tarap ketti. Oǵan senbeńizder. Biz buqaralyq aqparat quraldary arqyly únemi aqparat berip otyramyz", - deidi ákim.
Áskeri qoimadaǵy jarylys
26 tamyzda keshki saǵat 19:00 shamasynda Baizaq aýdanyndaǵy áskeri bólimge qarasty qoimalardyń birinde órt shyǵyp, onnan astam jarylys boldy. Órtti sóndirýge áskeri bólimniń jeke quramy men tótenshe jaǵdailar ministrliginiń qyzmetkerleri jumyldyryldy. Sonymen qatar áskeri bólimniń shynjyrly órt sóndirý mashinalary tartyldy.
Órt sóndirý kezinde bes áskeri qyzmetshi qaza boldy. Vedomstvo olardyń aty-jónin jariialady: serjant Marat Meshinbai, efreitor Rýslan Janbolatov, áskerilendirilgen kúzet qyzmetshisi Orazbek Dalibaev, áskeri prokýror Arman Kapezov jáne kelisimshart qyzmetiniń starshinasy Nádirbekov Erkin Erikbaiuly.
Oblystyq ákimdik taratqan málimetke sáikes, barlyǵy 88 adamǵa meditsinalyq kómek kórsetilgen. 27 tamyz saǵat ondaǵy jaǵdai boiynsha 28 adam aýrýhanada em qabyldap jatyr. Sonyń ishinde 6 adam ortasha aýyr hálde jatyr. Olardyń ómirine qaýip tónip turǵan joq.
Qaýipsizdik maqsatynda joldar jabylyp, temir jol qozǵalysy toqtatyldy.
