- Braziliianyń Rio-de-Janeiro qalasynda ótip jatqan Olimpiada oiyndarynda búgin sharshy alańǵa shyqqan Qairat Eraliev jekpe-jekten keiin, óz oiymen bólisti, dep habarlaidy Riodaǵy QazAqparat tilshisi.
«Men negizi jeńilgen joqpyn. Qarsylasymnan artyq judyryqtaspasam, kem bolǵan joq. Onyń soqqylarynyń barlyǵy meniń qorǵanysymnan óte almady. Al men kóptegen soqqylarymdy dóp tigizdim dep nyq senimmen aita alamyn», - dedi Eraliev.
Ol Dohada ótken álem birinshiliginde osy boksshymen kezdeskenin aitty.
«Men bul boksshymen Dohada ótken álem chempionatynda kezdeskem. Onda taza utylǵan bolatynmyn. Moiyndaityn kezde moiyndaý kerek. Al búgin utyldym dep aita almaimyn. Meni tóreshiler aiaǵymnan shaldy. Olimpiada júldesi buiyrmai turǵan shyǵar. Tóreshi kimniń qolyn kóterse, sol jeńdi degen sóz. biraq, kimniń myqty judyryqtasqanyn jankúierler, halyq kórip otyr. baǵasyn solar beredi», - dep áńgimesin qysqa qaiyrdy boksshy.
56 keli salmaqtaǵy el namysyn qorǵaǵan otandasymyz Qairat Eraliev ózbek Mýrodjon Ahmadalievten upai sany boiynsha utyldy.
Esterińizge sala keteiik. Qazaqstan Rio-de-Janeiro qalasynda ótip jatqan Olimpiada oiyndarynda jalpy esepte 2 altyn, 2 kúmis, 3 qola medalmen 16-orynda keledi.
Jarystyń alǵashqy kúninde dziýdodan erler arasynda 60 kelige deiingi salmaq dárejesinde synǵa túsken Eldos Smetov el qorjynyna kúmis júlde salsa, 48 kelige deiingi salmaqta áielder arasynda jarysqa qatysqan Otgontsetseg Galbadrah Olimpiada oiyndarynyń qola júldegeri atandy. Al úshinshi medaldi qorjynǵa aýyr atlet Farhad Harki saldy. Ol erler arasyndaǵy 62 kelige deiingi salmaq dárejesinde óner kórsetken bolatyn. Olimpiadanyń tórtinshi kúni taǵy bir aýyr atlet qyzymyz Karina Goricheva 63 keli salmaqta tórtinshi medaldi el qorjynyna salsa, Olimpiadanyń besinshi kúni eki sportshymyz - aýyr atlet Nidjat Rahimov pen Dmitrii Balandin 200 metr qashyqtyqqa júzýden eki altyndy jeńip aldy. Al osy kúni áielder arasynda synǵa túsken aýyr atlet qazaqtyń qyzy Jazira Japparqul kúmis júldeger atandy.
