Foto: depositphotos.com
29 naýryzda musylmandar úshin qasietti Ramazan aiy aiaqtalady. 30 naýryzda Oraza ait bastalady, dep habarlaidy Ult.kz.
Qoǵamdyq saiasat institýty 2025 jyldyń 17 aqpanynan 6 naýryzyna deiin júrgizgen saýalnama derekterine sáikes, respondentterdiń 38,9%-y Oraza ustaý nietterin bildirgen. Bul kórsetkish aldyńǵy jyldarmen salystyrǵanda joǵary (2022 jyly – 35,2%, 2024 jyly – 32,3%), iaǵni 6,6%-ǵa ósken.
Aimaqtyq taldaý nátijeleri boiynsha, oraza ustaýshylardyń eń kóp úlesi eldiń ońtústik jáne batys óńirlerine tiesili. Kóshbasshy Shymkent qalasy, munda 80,4% respondent Oraza ustaýǵa nietti ekenin aitqan. Sondai-aq Túrkistan (75%), Aqtóbe (58,3%), Qyzylorda (54,8%) jáne Almaty (50%) oblystarynda joǵary kórsetkishter tirkelgen.
Aýyl turǵyndary arasynda oraza ustaý deńgeii (45,1%) qala turǵyndarymen salystyrǵanda (35,4%) joǵary.
Jas erekshelikteri boiynsha taldaý kórsetkendei, respondent jasy kishi bolǵan saiyn, oraza ustaý yqtimaldyǵy artady. Máselen, 18–29 jas aralyǵyndaǵy jastardyń 43,5%-y oraza ustaýǵa daiyn ekenin aitsa, bul kórsetkish 30–45 jastaǵylarda – 40,3%, 46–60 jastaǵylarda – 37,1%, al 61 jastan asqandarda – 29,6%.
Burynǵydai, genderlik aiyrmashylyqtar statistikalyq turǵydan eleýsiz: erlerdiń 39,5%-y jáne áielderdiń 38,4%-y aýyz bekitýge daiyn.
Oraza ustaý josparlaryna dini senim deńgeii eleýli áser etedi: din talaptaryn qatań ustanatyn respondentter arasynda oraza ustaý yqtimaldyǵy joǵary.
Sondai-aq otbasydaǵy balalar sany men Oraza ustaý arasyndaǵy bailanys anyqtaldy: balalar sany kóp bolǵan saiyn, aýyz bekitý yqtimaldyǵy artady.
Bilim deńgeii boiynsha da uqsas úrdis baiqalady: joǵary bilimdi respondentter arasynda oraza ustaý úlesi joǵary.
Degenmen, saýalnamaǵa qatysqandardyń jartysynan astamy (53,5%) oraza ustaýdy josparlamaǵanyn atap ótken.
