Qaýipsizdik Keńesiniń Apparatynda balalardyń qaýipsizdigin qamtamasyz etý jáne quqyqtaryn qorǵaý máseleleri qaraldy, dep habarlaidy "Ult aqparat" Aqordanyń resmi saityna silteme jasap.
Memleket Basshysy Qasym-Jomart Toqaev 2020 jylǵy 1 qyrkúiektegi «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýynda balalardyń qaýipsizdigi men quqyqtaryn qorǵaý máselelerine erekshe nazar aýdarýdy, kámeletke tolmaǵandarǵa qatysty zorlyq-zombylyqqa bailanysty tergelip jatqan árbir isti baqylaýdy qamtamasyz etýdi tapsyrdy.
Osy baǵyttaǵy jumystardyń qazirgi jaǵdaiyn talqylaý jáne ony jetildirý sharalaryn ázirleý maqsatymen Prezidenttiń kómekshisi – Qaýipsizdik Keńesiniń hatshysy Áset Isekeshevtiń tóraǵalyǵymen keńes ótti.
Jiynǵa Bala quqyqtary jónindegi ýákil Arýjan Sain, Joǵarǵy Sottyń, Bas prokýratýranyń, Ishki jáne Syrtqy ister, Ádilet, Bilim jáne ǵylym ministrlikteriniń ókilderi qatysty.
Kámeletke tolmaǵandarǵa qatysty zorlyq-zombylyqqa, balalar saýdasyna qarsy is-qimyldardy, sondai-aq, balalar úileri men internattarda tiisti jaǵdailardy qamtamasyz etý máseleleri qarastyryldy.
Keńes qorytyndysy boiynsha Qaýipsizdik Keńesiniń Apparaty janynan balalardyń quqyqtary men zańdy múddelerin qorǵaý, kámeletke tolmaǵandarǵa qatysty qylmystyq qol suǵýshylyqtyń aldyn alý jáne jolyn kesý jónindegi barlyq ýákiletti organdardyń qyzmetin úilestirý úshin turaqty vedomstvoaralyq jumys tobyn qurý týraly sheshim qabyldandy.
Sonymen qatar kámeletke tolmaǵandardyń jynystyq tiispeýshilik quqyǵyna qarsy qylmys jasaǵany úshin jazasyn ótegennen keiin túrmeden bosatylǵan adamdardy baqylaýǵa jáne esepke alýdy qamtamasyz etý úshin memlekettik organdarǵa qosymsha sharalar qabyldaý tapsyryldy.
