5 - maýsym búkilálemdik ekologtar jáne qorshaǵan ortany qorǵaý kúni. Osy mereke qarsańynda qorshaǵan ortany qorǵap, ekologiianyń búlinbeýin qadaǵalap júrgen eko-ambassador, eko-patrýl negizin qalaýshy Timýr Eleýsizov óz oiymen bólisti, dep habarlaidy QazAqparat.
Timýr Eleýsizov ekologiialyq problemalardy sheshýmen ainalysady. Qazir ol Qazaqstan kásiporyndary men qaýymdastyǵynyń «Tabiǵat» ekologiialyq odaǵy tóraǵasynyń orynbasary jáne Almatydaǵy eko-ambassador.
Onyń aitýynsha, qazir ýaqytta ambassadordyń strategiiasy ázirlendi.
«Ambassador – bul salystyrmaly túrde aitsaq, memlekettik organdar men adamdar arasyndaǵy kópir. Biz osy salaǵa óz erkimizben kelgen, izgi nietti elshilermiz. Iaǵni, ideialarymyz ben oilarymyzdy bilikke jetkizip, ony júzege asyrýǵa múmkindik týdy»,– deidi Timýr Eleýsizov.
Timýrdyń aitýynsha, ol únemi ákesiniń kóleńkesinde qalyp otyrǵan. Aita keteiik onyń ákesi - eldegi eń tanymal ekologtardyń biri, Mels Eleýsizov ol uzaq ýaqyt boiy ekologiialyq máselelermen ainalysyp keledi.
«Men únemi izdenis ústinde boldym, uzaq ýaqyt boiy maǵan ne kerek ekenin zerttedim. Jasyratyny joq, únemi ákemniń kóleńkesinde qalyp qoiatynmyn. Bir sátte tabiǵatty qorǵaý, oǵan janashyrlyq tanytý meniń mindetim ekenin túsindim. Osy arqyly men eń aldymen balalarymnyń bolashaǵyna áser ete alamyn, eger bizdiń ekologiiamyz jaqsy bolsa, onda bizdiń balalarymyzdyń deni saý bolady»,– deidi ol.
Ekobelsendiniń negizgi mamandyǵy zańger. Sondyqtan ol ekologiia qatysty zańbuzýshylyqtardy jaqsy biledi.
«Men zańgermin. Ekologiia salasyna kóptegen zańsyzdyqty kórgendikten keldim. Ártúrli is-sharalarǵa qatysyp júrip, bul aspektini zańnama arqyly kúsheitý kerektigin túsindim, sol sebepti de eko-patrýl qoǵamdyq qozǵalysyn qurdym. Jumysymyz nátijie bere bastady. Mysaly, taýdaǵy qara topyraqty zańsyz alýshylardyń jolyn kestik, aǵashtardy jappai kesý azaidy. Aǵashtardy zańsyz otaǵandardy taýyp, olardy ákimishilk jaýapqa tartamyz»,– dedi spiker.
Sondai–aq, ol Alataý aýdanynda qaraǵai otyrǵyzý aktsiiasyn uiymdastyrǵany týraly aityp berdi.
«Bul aktsiiany qańtar aiynda uiymdastyrdyq. Azamattarymyz óz atynan aǵash otyrǵyzýǵa múmkindik aldy. Kóptegen kompaniia atsalysty. Aǵash kóshetterin adamdar ózderi satyp alady, biz uiymdastyramyz, olar otyrǵyzady. Qazir ákimdik osy jerdi abattandyryp qaraǵai skverin jasaýdy qolǵa aldy. Almaty ákiminiń qoldaýymen Almatyǵa million aǵash otyrǵyzý tujyrymdamasy ázirlengen bolatyn. «Shetsiz qala» qaǵidaty boiynsha aǵashtar qalanyń tómengi bóligine otyrǵyzylady. Sebebi, bul aýdandar da saiabaqtar men alańdar joq. Qaraǵai ormanyn qurý ideiasy paida boldy, ol mádeni ortalyq bolady, onda is-sharalar ótedi»,–deidi eko-patrýl negizin qalaýshy.
Onyń aitýynsha, karatin kezinde Almaty aýasy aitarlyqtai jaqsarǵan.
«Meniń oiymsha, aýa jaqsardy, biraq bul qysqa merzimdik áser. Óitkeni, ziiandy qaldyqtar bólip shyǵaratyn kásiporyndardyń jumysy toqtady. Sonymen qatar, avtomobilder aǵyny azaidy. Karantin kezinde aýany jalǵyz JEO lastady»,– deidi ol.
Aita keteiik, Timýr Eleýsizov Almatynyń ekologiialyq jaǵdaiyn jaqsartý úshin kóptegen jobalar men usynystar daiyndady.
«Kóp usynystar ázirledim. Birinshisi – elektr qýatymen júretin jáne gibridti kólikti damytý. Bul usynystar ákimdikke de, ekologiia ministrligine de joldandy. Sondai–aq, káýap pisiretinderdi arnaiy súzgi qondyrǵylaryn ornatýǵa májbúrleý kerek, óitkeni olar da aýany lastaýshylardyń biri. Aǵashtardy kesetinder de osylar. Statistikaǵa júginsek, bir káýaphana bir aptada bir KamAZ sekseýildi nemese basqa aǵash túrin jaǵyp jiberedi «,– deidi Timýr Eleýsizov.
Sóz sońynda, ol aldaǵy josparlarymen bólisti.
«Biz memlekettik organdarmen birlesip eko-patrýl qoǵamdyq baqylaýyn iske qosýdy josparlap otyrmyz. Sondai–aq, jazdyń sońynda eko-festival uiymdastyramyz»,– dep qortyndylady ol.
