Foto: Aqorda
Qasym-Jomart Toqaev Koreia Respýblikasy Prezidentiniń arnaýly ókili – Prezident Ákimshiliginiń basshysy Kan Hýn Shikti qabyldady, dep habarlaidy Ult.kz.
Memleket basshysy Koreia Respýblikasy Qazaqstannyń negizgi strategiialyq seriktesteriniń biri sanalatynyna nazar aýdaryp, ekijaqty yqpaldastyq qarqynyna joǵary baǵa berdi.
Prezident Qazaqstannyń korei halqyna jáne Koreia Respýblikasynyń damý deńgeiine qurmetpen qaraitynyn atap ótip, Astana eki el arasyndaǵy keńeitilgen strategiialyq seriktestikti odan ári nyǵaitýǵa nietti ekenin rastady.
Qasym-Jomart Toqaev Kan Hýn Shiktiń arnaýly ókil retinde elimizge jasaǵan saparynyń mańyzdylyǵyna toqtaldy jáne Koreia Respýblikasynyń Prezidenti Li Chje Miońge ystyq lebizin joldady.
– Sizdiń saparyńyz qazaq-korei yqpaldastyǵyn odan ári nyǵaitý turǵysynan óte mańyzdy. Birlesken kúsh-jigerdiń arqasynda elderimizdiń yntymaqtastyǵy arta túsetinine senimdimin, – dedi Memleket basshysy.
Kan Hýn Shik qonaqjailyq tanytqany úshin rizashylyq bildirip, Qazaqstannyń jańa Konstitýtsiiasyn qabyldaý boiynsha referendýmnyń tabysty ótýine orai Prezident Li Chje Miońniń quttyqtaýyn jetkizdi.
Arnaýly ókil Koreia Respýblikasynyń saýda-ekonomikalyq jáne investitsiialyq bailanystardy kúsheitý, sondai-aq túrli salada birlesken jobalardy iske asyrý arqyly ózara qarym-qatynasty múldem jańa deńgeige shyǵarýǵa airyqsha mańyz artatynyn málimdedi.
Áńgimelesý barysynda ekijaqty kún tártibindegi kóptegen másele, sonyń ishinde jahandyq naryqtaǵy qazirgi syn-qaterlerge bailanysty energetika, kólik-logistika salalarynda yqpaldastyq aiasyn keńeitý perspektivasy talqylandy.
Kezdesý sońynda Kan Hýn Shik Prezident Li Chje Miońniń Qazaqstan Prezidentin Koreia Respýblikasyna saparmen kelýge jáne biyl qyrkúiek aiynda Seýlde ótetin «Ortalyq Aziia – Koreia Respýblikasy» sammitine qatysýǵa shaqyratynyn aitty.
Qasym-Jomart Toqaev Ońtústik Koreia kóshbasshysynyń shaqyrýyn yqylaspen qabyl aldy. Memleket basshysy joǵary deńgeide ótetin aldaǵy kelissózder eki el yntymaqtastyǵyn jandandyryp, Ortalyq Aziia – Koreia Respýblikasy formatyndaǵy yqpaldastyqty arttyrýǵa oń septigin tigizetinine senim bildirdi.
