Qazaqstandyq kásipker turmysy nashar otbasyǵa bir bólmeli páter syilaǵysy keledi. Astanadaǵy bes balanyń qazasyna qynjylǵan er adam ózge biznesmenderdi muqtaj jandarǵa kómektesýge shaqyrdy, dep habarlaidy Sputnik agenttigi.
"Jurt aiyptyny izdep, memleketti kinálap jatyr, biraq bári kesh emes pe? Qazaqstanda basynda baspanasy joq, turmysy nashar kópbalaly otbasylar az emes. Men óz atymnan biznesten tapqan tabysymnyń múmkindigine qarai muqtaj otbasyǵa bir bólmeli páter alyp bergim keledi", - dedi qarjy kompaniiasynyń bas direktory Jandar Sadyqov.
Sadyqovtyń aitýynsha, páterdi biyl naýryz aiynyń sońyna qarai satyp alýǵa múmkindik bolady.
Astanada Kóktal-1 turǵyn úi alabynda ornalasqan "vremiankadaǵy" órt kezinde bes bala qaza tapty. 4 aqpan kúni túnde qyzdar úide jalǵyz qalypty – ata-anasy jumysta bolǵan. Otbasy elordada on jyldan beri turyp jatyr eken. Turmysy nashar turǵyndar qataryna da, baspana alý kezegine de tirkelmegen, alaida kópbalaly otbasy retinde járdemaqy alyp júripti.
