Jańa oqý jyly koronavirýs pandemiiasyna bailanysty qashyqtan oqý formatynda bastalady. Osyǵan orai bilim basqarmasy oqý jylynyń sátti bastalýy úshin daiyndyq júrgizip, qajetti sharalar qabyldaýda, dep habarlaidy Nur-Sultan ákimdiginiń resmi saity.
Nur-Sultan qalasy ákimdiginiń bilim berýdi jańǵyrtý ortalyǵy onlain sabaq ótkizýge arnalǵan birneshe virtýaldy platforma usyndy. Búginde qalanyń barlyq mektebi Daryn Online, Bilimland platformalarymen kelisim shartqa otyrǵan. Qazirgi tańda ustazdar interaktivti quraldar men tehnologiialardy, beinesabaq paidalanýdy meńgerip otyr.
«Bir platformanyń ózinde oqýlyqtar men tsifrlyq resýrstardy qoldanyp, sabaq ótkizýge múmkindik bar. Keri bailanys jasaýǵa, oqýshynyń bilimin tekserýge bolady. Sondai-aq Opiq.kz arqyly «Almatykitap» tsifrly oqýlyqtaryn qoldanýǵa jaǵdai jasalǵan», – dedi bilim berýdi jańǵyrtý ortalyǵynyń direktory Áliia Maqysheva Astana Life baǵdarlamasynda.
Maýsym aiynda iske qosylǵan ekinshi onlain platforma ustazdardyń ózara tájiribe almasýyna, ádistemelik kómek kórsetýge arnalǵan. Ár juma saiyn úzdik ustazdar belgili bir taqyryp boiynsha onlain konferentsiiada óz tájiribesimen bólisedi.
«Pedagogikalyq tájiribe alańy» barlyq ustazǵa qoljetimdi. Bilim berýdi jańǵyrtý ortalyǵy direktorynyń orynbasary Syndar Daýeshova tájiribe almasý maqsatynda Kembridj ýniversiteti professorlarymen bailanys ornatylǵanyn atap ótti.
Jaqynda iske qosylǵan úshinshi onlain platforma ustazdardyń kásibi biliktiligin arttyrýǵa baǵyttalǵan. Academia.kz pedagogikalyq sheberliktiń virtýaldy zerthanasy arqyly muǵalimder túrli kýrstardan ótip, sertifikat alady.
Virtýaldy zerthanada Nazarbaev ziiatkerlik mektepteri men elimizdegi eń úzdik ustazdarynyń avtorlyǵymen engizilgen kýrstar jinaqtalǵan. Qazirdiń ózinde bes myń maman onlain sertifikat alyp úlgerdi.
«Ustazdar berilgen tapsyrmalardy oryndap, ártúrli deńgeilerden ótedi. Sodan keiin baryp sertifikat alady», – dep atap ótti pedagog Maira Boranbaeva.
Nur-Sultan qalalyq bilim berýdi jańǵyrtý ortalyǵy tamyz aiynda «Tsifrlyq pedagogika: oqytý jáne tájiribe» taqyrybynda onlain-oqytý ótkizýdi josparlap otyr. Onda 12 480 muǵalim qamtylady.
