Atyraý oblysy Qyzylqoǵa aýdanynyń ákimdigi Janterek aýylynda mektep oqýshysynyń internet-signalyn ustaýǵa tyrysyp, biikten qulaǵany týraly aqparatty joqqa shyǵardy, dep habarlaidy "Ult aqparat" stopfake.kz saityna silteme jasap.
Buǵan deiin keibir buqaralyq aqparat quraldarynda 3-synyp oqýshysy Aqjúrek Qýanysh muǵalimge úi tapsyrmasyn jiberý úshin traktorǵa shyqqany týraly aqparat taraǵan bolatyn.
Aýdan ákimdiginiń málimetinshe, bala Janterek aýylynan 10 shaqyrym jerde ornalasqan Qarakól qystaǵynda jaraqat alǵan. Ol onda demalys kúnderi ata-ájesine qonaqqa barǵan. Oiyn barysynda Aqjúrek traktorǵa shyǵyp, qulaǵan. Bul týraly ol úlkenderge aitpaǵan.
Dúisenbiden sársenbige deiin sabaǵyna qatysqan. Qolynyń aýyrǵany basylmaǵan soń, beisenbi kúni ata-anasy balany Atyraýdaǵy aýrýhanaǵa alyp barǵan. Onda onyń iyǵy synǵany anyqtalyp, gips salynǵan.
Dárigerler onyń jaǵdaiyn turaqty dep baǵalaýda.
«Janterek aýylyndaǵy №75 bastaýysh mektebi shtattyq rejimde jumys isteýde. Mektepte 41 oqýshy dástúrli formatta bilim alýda. Janterek aýylynda 65 úi bolsa, onyń 48-i symdy internetke qosylǵan. Sondai-aq, aýyl turǵyndary 3G formatyndaǵy symsyz internetpen qamtamasyz etilgen», – delingen ákimdik habarlamasynda.
