QR Densaýlyq saqtaý ministri Aleksei Tsoi Pfizer vaktsinasy aqyly segmentke qashan shyǵatyny týraly pikir bildirdi, dep habarlaidy QazAqparat.
«Pfizer vaktsinasynyń quny boiynsha aitsaq, biz Pfizer kompaniiasymen aqyly vaktsinatsiia múmkindigi týraly kelisip jatyrmyz. Qajettilikti anyqtaý úshin tizimder jinalýda. Qazir Almatydaǵy emhanalar halyqtyń suranysyn zerttep jatyr. Vaktsinanyń jaramdylyq merzimi bar ekenin túsiný kerek. Bul vaktsinany qansha azamat alǵysy keletinin anyqtap alý mańyzdy. Nur-Sultan qalasynda da osyndai jumys júrip jatyr. Qazir barlyq jerde, óńirlerdiń bárinde osy is jolǵa qoiylǵan. Naqty qansha doza qajet, qansha azamat aqyly negizde vaktsina alǵysy keledi? Osyny anyqtaǵannan keiin ǵana naqty qansha vaktsina jetkizý kerektigi anyq bolady», - dedi Aleksei Tsoi BAQ ókilderine bergen suhbatynda.
Densaýlyq saqtaý ministri Pfizer vaktsinasyn salý naýqany birqalypty, yń-shyńsyz ótip jatqanyn da atady.
«Vaktsinatsiia naýqany tynysh ótip jatyr dese de bolady. Júkti jáne bala emizetin áielder tarapynan vaktsina suraýshylar kóp edi. Solardyń degeni boldy. 12 jastan asqan balalar da óte belsendi vaktsina alyp jatyr. Men Pfizer vaktsinasy aqyly segmentke qashan shyǵatynyn áli naqty aita almaimyn, biraq jaqyn arada deýge negiz bar. Bul máseleni biz turaqty túrde talqylap jatyrmyz, másele pysyqtalýda», - dedi ministr.
