Terrorizmge qarsy operatsiiany júrgizý barysynda urlanǵan qarýdyń 515-i tabyldy. Bul týraly Ortalyq kommýnikatsiialar qyzmetinde QR IIM Tergeý departamentiniń bastyǵy Sanjar Ádilov málim etti, dep habarlaidy QazAqparat.
«Terrorizmge qarsy operatsiiany júrgizý barysynda urlanǵan qarýdyń 515-i tabylyp, tárkilendi. Onyń ishinde 75 avtomat, 133 pistolet, 2 pýlemet, 47 oiyq ári 103 tegis uńǵyly qarý, 100-den astam granata, 9 myńnan astam oq-dári. Qarýdy urlaǵany úshin 98 adam ustalyp, ýaqytsha ustaý abaqtysyna qamaldy jáne olardy zańsyz saqtaǵany úshin 61 adam ustaldy», - dedi S. Ádilov.
Osy oraida ol urlanǵan qarý halyqtyń ómiri men qaýipsizdigine qaýip tóndiretinin, óitkeni ol endi kez kelgen zańsyz áreketterge qoldanylýy múmkin ekenin atap ótti.
«Barlyq adamdardyń qarýdy urlaýǵa qatysy bolmaýy múmkin ekenin eskere otyryp, taýyp alǵan azamattardy erikti túrde tapsyrýǵa taǵy da shaqyramyz. Búgingi tańda 31 qarý erikti túrde tapsyrylǵanyn atap ótkim keledi. Arnaiy jedel-tergeý toptary quryldy jáne jumystaryn atqaryp jatyr, kásibi kómek kórsetý úshin IIM Ortalyq apparatynan tájiribeli qyzmetkerler jiberildi. Osy múmkindikti paidalana otyryp, azamattardy taǵy da tynyshtyqqa jáne tolyq, jan-jaqty ári obektivti tergep-tekserýge baǵyttalǵan tergeý rásimderine túsinistikpen qaraýǵa shaqyramyn», - dedi Sanjar Ádilov.
