QR Mádeniet jáne sport ministrligi Live formatynda «Karantindegi juldyz» atty jańa joba bastaidy. Bul týraly atalǵan ministrliktiń baspasóz qyzmetinen málim etti, dep habarlaidy "Ult aqparat".
«Qazaqstandyq mádeniet jáne sport uiymdary jariialanǵan karantin jaǵdaiynda kórermender men jankúierlerden alystamai, onlain-keńistikti qarqyndy igerýde. Mádeni is-sharalardy ótkizýge qoiylǵan ýaqytsha shekteýler ártister úshin jańa múmkindikterge jol ashty. Karantin kezinde adamdardyń basym kópshiligi áleýmettik jelilerdi belsendi paidalanatynyn eskere kele, ónerdiń qoljetimdiligin barshaǵa qamtamasyz etý maqsatynda QR Mádeniet jáne sport ministrligi jáne «Qazaqtelekom» AQ Live formatyndaǵy «Karantindegi juldyz» atty jańa jobany bastaidy», - dep atap ótedi ministrlikten.
Vedomstvo málimetinshe,jýyrda qazaqstandyq ártister onlain formatta «Qazaqtelekom» AQ-nyń telecomkz YouTube arnasy arqyly ózderiniń onlain-kontsertterin usynady. Sondai-aq bul kontsertter QR Mádeniet jáne sport ministrliginiń Facebook jáne Qazaqkontserttiń @qazaqconcert Youtube paraqshalarynda qaitalanady. Óner súier qaýym ár túrli baǵyttaǵy – folklorlyq, estradalyq, klassikalyq jáne aspaptyq kontsertterdi tamashalaidy. Kontsert barysynda tyńdarmandar óner juldyzdarymen tikelei suhbattasyp, oi-pikirlerin bildire alady. Kontsertter tegin ári barshaǵa qoljetimdi bolmaq.
Jobanyń alǵashqy onlain-kontserti búgin, 23 naýryz kúni saǵat 21:00-de Telecomkz YouTube arnasynan kórsetiledi. Bul keshte qońyr daýsymen, júrekke jyly únimen, ásem áýendi ánderimen kórermenniń yqylasyna bólengen óner iesi Jubanysh Jeksenuly óner kórsetedi.
